Ақмола облысында "Qnet World" қаржы пирамидасын ұйымдастырғандарға қатысты тергеу басталды
Қаржылық мониторинг агенттігі Ақмола облысы бойынша департаменті қылмыстық жолмен алынған ақшаны заңдастыру фактісі бойынша қаржы пирамидасының екі ұйымдастырушысына қатысты сотқа дейінгі тергеуді бастады, деп хабарлайды Stan.kz ақпарат агенттігі.
Видеодан скриншот
Салымшыларды тарту схемасына сәйкес азаматтарға саяхатшының картасы шотына 2 000 АҚШ долларын салып, оны 6 900 АҚШ доллары етіп қайтару ұсынылған. Бұл ақша шетелдік қонақүйлердегі қызмет құнының 80% төлеуге жұмсалуы туралы жалған ақпарат таратқан.
Сонымен қатар ақшаның орнына 5 смарт-сағат сатып алуға онлайн несие беру ұсынылған. Салымшылар смарт сағаты алмаған, орнына "Qnet Mobile" қосымшасындағы жалған шотқа "Экардтар" түсіп отырған. Оларды жолаушы картасын сатып алғанда пайдалануға болады деп сендірген.
“Ұйымдастырушылар 8,5 миллион теңге көлеміндегі қылмыстық кірістің бір бөлігін қазақстандық банктердің біріндегі депозиттік шоттарға салып, депозит бойынша сыйақы түрінде қосымша табыс алған”, – делінген хабарламада.
Қазір тергеу амалдары жүргізілуде. Қылмыстық-процессуалдық кодекстің 201-бабына сәйкес тергеу мүддесіне қатысты өзге де мәліметтер жария етілмейді.