Азаматтық авиация комитеті Бас көлік прокуратурасының талаптарына сәйкес “Air Astana” және “Fly Arystan-ға” қатысты жоспардан тыс тексеру ұйымдастырылғанын мәлімдеді.
Комитет кәсіпкерлік кодексінің нормаларына сілтеме жасап, мұндай тексерудің негізі прокурордың азаматтардың, бизнестің немесе мемлекеттің құқықтарына мүмкін болатын зиян фактілеріне қатысты нақты талаптары екенін атап өтті.
Сонымен бірге Азаматтық авиация комитеті сұратылған ақпараттың бір бөлігі бақылау нысанына жатпайтынын мәлімдеді.
“Бақылау және қадағалау органы құжаттар мен ақпаратты тексеру немесе профилактикалық бақылау нысанына (объектісіне) қатысы болмаса, сұратуға құқығы жоқ. Барлық деректер профилактикалық бақылау немесе тексеру нысанына жатпайды”, – деп жауап берді ведомство.
- Жеңілдетілген билет дауы: Көлік министрлігі Air Astana экс-қызметкерінің мәлімдемесіне қатысты тексеріс бастады
- Билетті жеңілдікпен алған: Питер Фостердің әйелі өзіне қатысты айыпқа жауап берді
Сондай-ақ комитет “сот өндірісі тәртібімен қаралуы тиіс өтініштер, арыздар және шағымдар басқа ешбір орган, лауазымды немесе жеке тұлғалар тарапынан қаралмауы немесе бақылауға алынбауы тиіс” деп атап өтті.
“Сот әділ шешім қабылдауына кедергі келтірілмейді және заң бойынша жауапкершілікке әкеп соғады”, – деп мәлімдеді Азаматтық авиация комитеті.
Еске салсақ, FlyArystan компаниясының бұрынғы топ-менеджері Ренат Абулханов Air Astana әуе компаниясының әуе билеттерін жеңілдікпен басшылықтың туыстарына рәсімделіп, сатылғанын мәлімдеген болатын. Қорғаушы тараптың нұсқасы бойынша, жеңілдікпен билет алғандардың қатарында Air Astana басшысы Питер Фостердің жұбайы да болған.
Адвокаттардың айтуынша, билеттер басшылықтың тікелей нұсқауымен рәсімделген. Алайда Татьяна Фостер куә деп танылмаған еді.
