Жұмысы үшін 4,2 миллион сұрайды: Еңбек министрлігі ең "қымбат" мамандарды атады

Фото: Freepik.com

Наурыз айында Enbek.kz электронды еңбек биржасында жұмыс берушілер шамамен 102,6 мың бос жұмыс орнын жариялаған. Ал жұмыс іздеушілер 107,1 мың түйіндеме орналастырған. Еңбек және халықты әлеуметтік қорғау министрлігі қолда бар вакансиялар мен ұсынылған жалақы көлемі туралы мәлімет берді. Бұл туралы Stan.kz ақпарат агенттігі хабарлайды.

Министрлік деректеріне сүйенсек, наурызда Қазақстанда жұмыс берушілер ең жоғары жалақыны мына мамандарға ұсынған:

• Заң бөлімі басшысының орынбасарларына – шамамен 1,4 миллион теңге;
• Бағдарламалық қамтамасыз ету архитекторларына – шамамен 1,38 миллион теңге,
• Өндіруші саладағы өндіріс басшыларына – шамамен 1,14 миллион теңге.

Ал жұмыс іздеушілер өз түйіндемелерінде бұдан да жоғары жалақы күтетінін көрсеткен. Ең жоғары жалақы сұрағандар:

• HR-бизнес-серіктестер – шамамен 4,2 миллион теңге;
• Каротажшылар (ұңғымамен жұмыс істейтін мамандар) – шамамен 3 миллион теңге;
• Өнеркәсіп саласындағы зертхана басшылары – шамамен 2,5 миллион теңге.

2026 жылғы наурызда еңбек нарығында не болды?

2026 жылдың басынан бері Enbek.kz платформасында 304 мыңнан астам бос жұмыс орны және шамамен 394,5 мың түйіндеме жарияланған. Ақпанмен салыстырғанда жұмыс берушілер ұсынған вакансиялар саны 3,7 пайызға өскен. Ал жұмыс іздеушілердің белсенділігі 14,3 пайызға төмендеген.

Қай салаларда сұраныс жоғары?

Ең көп бос жұмыс орны білім беру саласына тиесілі – 22,6 мың вакансия. Сондай-ақ өзге қызметтер секторында да сұраныс жоғары болып, 21,2 мың бос жұмыс орны тіркелген.

Денсаулық сақтау мен әлеуметтік қызмет көрсету саласында кадрларға тұрақты сұраныс сақталып отыр – 8,7 мың вакансия. Сонымен қатар ауыл, орман және балық шаруашылығы саласында 7,9 мың бос жұмыс орны бар.

Ең көп жұмыс ұсынысы Түркістан облысында жарияланған – 7,7 мың вакансия. Одан кейін Қарағанды облысы – 7,6 мың, Астана – 7,2 мың, Павлодар облысы – 7,2 мың және Атырау облысы – 6,5 мың вакансия.

Қазақстанда шетелдік ғалымдар отандық мамандардан 50 есе көп жалақы алып келген

Оқыңыз

Жұмыс іздеушілердің біліктілігі мен жасы

Барлық вакансияның шамамен 40% орта деңгейлі біліктілігі бар мамандарға арналған. Төмен біліктілікті қажет ететін жұмыс орындарына ұсыныстардың 31% тиесілі болса, жоғары білікті мамандарға арналғандары 29%.

Жұмыс іздеушілердің арасында 35 жасқа дейінгі жастар басым – түйіндемелердің 42%. 35-44 жас аралығындағы кандидаттар 26%, 45-54 жас аралығындағылар 20%, ал 55 жастан асқандар 12%.

Барлық жұмыс іздеушінің 54% – әйелдер, 46% – ер адамдар.