Бақытжан Базарбек жер реформасын және жер саласын цифрландыруға кіріскендігін мәлімдеді. Депутаттың айтуынша, бұл жақсы бастама болғанымен, еліміздің барлық төңірегінде жер саласындағы жемқорлық пен алаяқтық істер өршіп кеткен.

“Қай-қайсысын алсақ та, халықтың жермен байланысты зары жергілікті прокурордың, ішкі істер органдары қызметінің шикілігі, әрекетсіздігі және кей жағдайда тікелей араласуы салдарынан орын алып отыр. Түркістанда Мәншүк Сыздықова атты кәсіпкердің жері мен бизнесіне тиесілі мемлекеттік қажеттіліктер үшін алу барысында өтемақы қаржыны алаяқтық іс жасаған азаматтар жалған сенімхаттың негізінде қолды қылып, соттың заңды күшіне енген шешіміне қарамастан, Түркістанның ішкі істер органдары қылмыстық іс қозғауға асығар емес. Сорақысы, Түркістан қаласы әкімдігінің шенеуніктері алаяқтармен өзара ауыз жаласуы болып отыр”,- деді ол.

Депутат атап өткендей, Солтүстік Қазақстан облысы Шал ақын ауданында 2009 жылдары шығарылған шешімдер салдарынан "Балуан" СК ЖШС-нде 286 жуық жер үлескерлері 4985 гектар жерінен заңсыз айырылған. Қазір қылмыстық іс қозғалса-дағы, күдіктілер бостандықта емін еркін жүргенін айтып өтті. Соттың заңды күшіне енген шешімі бойынша жалпы жиналыстың шешімі заңсыз деп танылса-дағы, соттар бұрынғы әкімнің шығарған заңсыз қаулысын бұзуға асықпайды. Ал сол қаулыларға қол қойған бұрынғы әкім қазіргі таңда Үкіметтің құрамында Вице-министр қызметін атқарып жүр деген мәлімет келтірді.

“Жетісу облысын алыңыз. Мұнда, бір топ алаяқтық жасаған азаматтар жергілікті прокурорлар мен ішкі істер органдарының көмегімен Үбен Машарбетов деген ақсақалды алдап, оның сыртынан жалған шарт жасап, 4000 гектар жерін және ақсақалдың туған баласына тиесілі 2 гектар жерін жалған сенімхаттың нәтижесінде өз атына рәсімдеп алған. Ұзақ жыл бойы Ү. Машарбетовтың атынан субсидия алып отырған. Ең сорақысы, Ү. Машарбетовтың арызы бойынша қылмыстық іс 10 рет қозғалып, жоғары шенділердің ықпалымен 11 рет жабылған! Сорақының сорақылығы, қылмыстық іс материалына сәйкес, осы алаяқтық іс-әрекеттерді ауылдық округ әкімі жасаған”,-деді ол өз баяндамасында.

Тура осындай жағдай Жамбыл облысының Кордай ауданында "Ноғайбай Казэксим" кәсіпорынының 360 жуық жер үлескерлері отбасы (2000 жуық адам) бір сәтте Мұхтар Әблязовтың алаяқтық іс-әрекеті салдарынан 14059 гектар жерінен айырылған деген де дерек келтірді. Сорақысы, мұны облыс прокурорлары мен ішкі істер органдары түсініп біліп тұрса да, үлескерлердің жерлерін аукцион арқылы сатылуын бұғаттай алмағанын айтты. Ең қызығы, Әблязовтың алаяқтықтығымен саудаға салынған екі ауылдың жерін электрондық аукционда 93 жастағы кемпір сатып алған.

“Ал, Тұрар Рысқұлов ауданында алаяқтық іс жасаған азаматтар шаруа қожалығы иесі Игенбековтін 1542 гектарға жуық ауыл шаруашылық мақсатындағы жерін қолды қылу үшін 2019 жылы жалпы жиналысты ұйымдастыру үшін ресми 2004 жылы қайтыс болған жер үлескерлерін "тірілтіп", олардың қолымен жерлерін әкімнің қаулысы бойынша өз атына аударып жіберген. Ал аты шулы Кербұлақ ауданының "Бостан" өндірістік кооперативі үлескерлері өзіне тиесілі 2000 гектар жерінен шенеуніктер мен құқық қорғау органдары жауапсыздығы кесірінен айырылып отыр! "Бостан"-ның жерін алып алған кәсіпорын "Бостан"-ның жер үлескерлерін өз кәсіпорының қатысушысы етіпенгізбей отыр. Шыдамы таусылған халық Астанаға барғалы отыр”,- деді депутат.

Бақытжан Базарбек әрбір өңірдегі бизнесмен-сымақ азаматтардың алаяқтық іс-әрекеттері жергілікті құқық қорғау органдары тарапынан тиісті дәрежеде тергелмей жатқанын айтты. Мұның зардабын қарапайым халық көріп отыр деді депутат.

“Солтүстік Қазақстан облысы Ақжар ауданында ауданның жемқор шенеуніктері мен алаяқтарға алданып жерінен айырылған "Бостандық" ауылының үлескерлері 10 жыл бойы жерді игермеген шаруа қожалығынан жерді алып коюын талап еткеніне бірнеше жыл болды. Амалсыз, конфликтінің ушығуы соншалықты, жер үлескерлері жүріп келе жатқан трактордың астына жатуға дейін барып жатыр.Жалпы, Солтүстік Қазақстан, Ақмола, Қызылорда, Алматы, Жетісу облыстарында күмәнді жолмен жерді иеленіп алған жер иелері мен жер үлескерлердің арасындағы конфликтлердің ушығып кеткені соншалық халыққа карсы автоматпен оқ ату, үлескерлерді үйлерінің алдында күзетіп ұрып-соғу, өлтіру туралы қорқыту әрекеттері ушыгып кетті. Жерді заңсыз иеленіп алған алаяқтар әкімдіктегі отырған жемқор шенеуніктердің, жергілікті прокуратура мен ішкі істер органдарында, сол сияқты жоғары билікте отырған аға-көкелерінің арқасында тайраңдап отыр”,- деп атап өтті Базарбек.

Бақытжан Базарбек әрбір факті бойынша тиісті құжаттарды жолдаутынын айтты.

“Біріншіден, әрбір факті бойынша мен тиісті құжаттарды жолдаймын. Бас Прокуратура алаяқтықтық факті бойынша тергеу жұмыстарын бастау қажет! Екіншіден, үлес жерлері бар ауыл шаруашылық кәсіпорындардың жарғылық капиталы мен мүлкін қайтадан бағалаудан өткізу қажет. Жер үлескері қайтыс болған не шетелге көшіп кеткен ауыл шаруашылық кәсіпорындардың жарғылық қапиталы еш өзгермеген, жердің жалпы көлемі де өзгермеген. Бұл заңсыз тірлік және Бас Прокуратура бұны дереу қолға алуы тиіс. Ашынған, алданған халықтың шыдамы таусылды. Енді ес жимасақ, барлығымыздың жағдайымыз мүшкіл болады”,- деді Бақытжан Базарбек өзінің депутаттық сауалында.

Талқылау