Желідегі жазбаға лүпіл баспағандарды қудалаған: Шымкент жастар орталығының басшысы жазаланды

Желідегі жазбаға лүпіл баспағаны үшін қызметкерлерін қудалаған Шымкент қалалық жастар ресурстық орталығының басшысы жазаланды. Бұл туралы Stan.kz ақпарат агенттігі хабарлайды.

Фото: Facebook Азат Дидарбек

Әлеуметтік желідегі дауға қатысты Шымкент қалалық ішкі саясат және жастар ісі басқармасының басшысы пікір білдірді.

“Жастар ресурстық орталығында болған жағдай — екі қызметкер арасындағы ішкі еңбек дауы, оны ұжым ішінде, кураторлары ретінде менің алдыма келіп шешуге болатын еді. Бірақ бұл мәселе әлеуметтік желілерде қоғамдық резонанс тудыру арқылы шешілді. Ресми өтініш ақпарат желіде тарағаннан кейін ғана "е-Өтініш" платформасы арқылы түсті", – деді ішкі саясат және жастар ісі басқармасының басшысы Әйгерім Жұмақұлова.

Сонымен қатар Жұмақұлова орталық басшысының қызметкерлерден әлеуметтік желілерде белсенді болуды талап еткенін растады. Басшы бұл әрекеті үшін жазаланған.

“Қызметкерлерден әлеуметтік желілерде белсенділік талап еткен орталық басшысының әрекеті дұрыс емес деп танылды. Оған қатысты тәртіптік жаза қолданылды", – деді басқарма басшысы.

Еске салсақ, бұған дейін Шымкент қаласы жастар ресурстық орталығының басшылығы қызметкерлерге әлеуметтік желідегі жазбаға лүпіл баспағаны үшін ескерту жасағаны туралы жазғанбыз.