Қазақстанда мамыр айында аптап ыстық болады

Фото: Dweberins

"Қазгидромет" РМК республика бойынша 2025 жылдың мамыр айына арналған ауа райы болжамын жариялады. Бұл туралы Stan.kz ақпарат агенттігі хабарлайды.

Синоптиктердің болжамынша, мамырда Қазақстанның басым бөлігінде орташа температура  нормадан 1° жоғары болады.

Шығыс Қазақстан облысында, Алматы облысының оңтүстік-шығысында, Жетісу, Абай облыстарында ауа температурасы қалыпты деңгейде қалады. Республиканың басым бөлігінде жауын-шашын нормадан аз болады. 

• Қазақстанда биылғы соңғы қоңырау басқа күнге ауыстырылды

Солтүстік-батыс және солтүстік облыстарда, Қызылорда, Түркістан, Жамбыл облыстарының оңтүстігінде, Алматының оңтүстік-шығыс бөлігінде, Шығыс Қазақстан, Жетісу, Абай облыстарында ауа райы қалыпты күйде болады. Мамырдың бірінші онкүндігінде Қазақстанның басым бөлігінде жаңбыр жауып, найзағай ойнайды, кей жерлерде жел соғады. 

Оңтүстік және оңтүстік-батыс облыстарда шаңды дауыл соғуы мүмкін. Кей күндері елде ала бұлтты, жауын-шашынсыз ауа райы сақталады.

Ауа температурасы ай бойы өзгеріп отырады:

• республиканың батысында түнде +4+9°C-тан +9+14°C-қа дейін, күндіз +15+20°C-тан +22+30°C-қа дейін;
• республиканың оңтүстік-батысында түнде +10+15°С-тан +12+20°C-қа дейін, күндіз +20+25°C-тан +25+33°C-қа дейін;
• солтүстік-батыста, солтүстікте, шығыста, Қазақстанның орталығында түнде 0,+5°С, аяз 1-6°С +8+15°С, күндіз +10+18°С-тан +23+30°С-қа дейін;
• Республиканың оңтүстік жартысында ауа температурасы түнде +5+12°С-тан +15+20°C-қа дейін, күндіз +18+25°С-тан +28+35°С-қа дейін біртіндеп жоғарылайды. 
• Оңтүстікте және оңтүстік-шығыста ауа температурасы күндіз +36 градусқа дейін жетеді. Бірақ +20...+25 градусқа дейін төмендейтін кезеңдері болуы мүмкін.
• Егер арктикалық ауа массалары топырақ бетіне енсе, -2 градусқа дейін аяз болуы мүмкін.

Айта кетейік, бұған дейін  Қазақстанның 13 облысында ауа райына байланысты ескерту жарияланғаны туралы жазған едік.