"Заңсыз жанармай алымын қосқан": Air Astana әуекомпаниясына 7 миллиард теңгеге жуық айыппұл салынды

Бас көлік прокуратурасы Air Astana, Qazaq Air және FlyArystan әуетасымалдаушыларының жұмысында көптеген өрескел бұзушылықтарды анықтады. Бұл туралы Stan.kz ақпарат агенттігі Kaztag.kz сайтына сілтеме жасап хабарлайды. 

Әуекомпаниялар негізсіз баю мақсатында бағаны өсірген.

"Air Astana және Qazaq Air әуеакомпанияларынның көлігінде жолаушыларды, багажды және жүктерді тасымалдау қағидаларының 2-тарауының 5-тармағының талаптарына қайшы әуе кемесінің есептелген сыйымдылығынан тыс билеттерді сату практикасы таратылған. Сондай-ақ халықаралық бағыттардағы арнайы тарифтер бойынша балалар билетін ересектер билетінің құнымен сатқан, ал кәмелетке толмаған жолаушыларға 50% жеңілдік көзделген", – делінген Бас көлік прокуратурасының анықтамасында.

18 тамызда кәмелетке толмаған жолаушыларға бірқатар шектеулері бар "Лайтс" арнайы тарифі бойынша Qazaq Air әуекомпаниясының рейсіне 119 699 теңгеге "Астана-Баку" бағыты бойынша билет сатып алынды. Осындай заңбұзушылықтар FlyArystan әуекомпаниясынан да анықталған.

Аталған фактілер бойынша әуекомпаниялар прокурорлық қадағалау актісі негізінде әкімшілік жауапкершілікке тартылды.

Солтүстік Қазақстан көлік прокуратурасы Qazaq Air әуекомпаниясынан әуе жолаушыларының құқықтарын сақтау бойынша талдау нәтижелерінен қосымша алымдардың заңсыз алынғанын анықтады.

"Әуекомпания қосымша ақыға жүзеге асырылатын субсидияланған әуемаршруттар, оның ішінде "Астана-Петропавл-Астана" және "Алматы-Петропавл-Алматы" бойынша ұшақ бортындағы 1-ден 16-ға дейінгі қатарлардан жолаушыларға орын таңдау мүмкіндігін берді. Бұл ретте билеттер құнының қолданыстағы тарифіне қосымша қызметтер құны белгіленген", – делінген құжатта.

Прокуратура актісі бойынша қосымша алымдарды заңсыз алу жойылды.

"Air Astana" АҚ әуекомпаниясы авиаотын бағасының өзгермейтіндігіне қарамастан, жолаушыларға жанармай алымын негізсіз қолданған.

“Әуекомпания тасымалдау бағытына байланысты 3500-ден 6500 теңгеге дейін жанармай алымын алды. Бұл ретте қашықтық есепке алынбады. Себебі "Астана-Орал" және "Алматы-Орал" маршруттары бойынша отын алымы бірдей 6500 теңге, бірақ қашықтықтағы айырмашылық 692 км", –  делінген анықтамада.

Прокуратураның ұсынысы бойынша әуекомпанияға 6,8 миллиард теңге мөлшерінде әкімшілік айыппұл салынды. Сонымен қатар прокурорлық қадағалау актісі бойынша көлік министрлігі отын алымын болдырмау бойынша шаралар қабылдауда.