Ыстықкөлде екі ауылдың тұрғындары қазақстандық туристер үшін төбелесіп қалды
Қырғызстанда Ыстықкөл облысының екі ауылы туристер үшін жаппай төбелеске барды. Алайда төбелес барысында ешкім зардап шекпеген.
Бұл туралы bnews.kz хабарлайды.
Оқиға 27 маусым күні кешкі уақытта Садыр Әке мен Қашат ауылдары тұрғындарының арасында болған. Олар келген туристерге кім қызмет көрсетеді деп сөзге келген. Ақыры ауызша ұрыстың соңы төбелеске ұласыпты. Оқиға орнына келген полицейлер жағдайды бірден реттей алмай, ақыры көз жасаурататын газ қолдануға мәжбүр болыпты.
Ауылдар орналасқан Григорьев сайы Ыстықкөлдің солтүстік жағалауында Шолпан-Ата қаласынан 60 шақырым қашықтықта орналасқан.
2015 жылы Қазақстаннан Қырғызстанға 2 миллионға жуық турист барған. Туризм департаментінің мәліметінше, қазақстандықтардың басым бөлігі жазғы уақытта демалыс орыны ретінде Ыстықкөлді таңдайды екен. Ал басқалары тау-шаңғы базаларына, велосипедпен серуендеуді, альпинизммен айналысуды қалаған.