"Ұлттық қор – балаларға": Мәжіліс депутаттары Сенат қайтарған заңды қабылдады
Мәжіліс Сенаттың Ұлттық қордан балаларға төленетін төлемдер туралы заңға енгізілген түзетулерді қарап, келісті. Бұл туралы Stan.kz ақпарат агенттігі хабарлайды.
Мәжілісмен Берік Бейсенғалиев балаларға Ұлттық қордан қаражат бөлу, оларды төлеу және пайдалану мәселелері бойынша түзетулерге депутаттар бастамашы болғанын айтты. Заң мемлекет басшысының 2024 жылдың 1 қаңтарынан "Ұлттық қор – балаларға" жобасын іске қосу туралы тапсырмасы негізінде әзірленген.
Оның аясында Ұлттық қордың жылдық инвестициялық кірісінің 50 пайызын балаларды мерзімінен бұрын алу құқығынсыз 18 жасқа толғанға дейін арнайы жинақ шоттарына ұстау ұсынылып отыр.
Еске сала кетейік, 20 қыркүйекте мәжіліс бұл заңды сенаттың қарауына жолдаған еді. Алайда сенат депутаттары13 қазанда оны кері қайтарды. Қаржы және бюджет комитеті Сенат енгізген түзетулерді қарап, олар редакциялық, нақтылаушы және құқықтық сипатта болғандықтан, заңның тұжырымдамалық ережелерін өзгертпейтінін атап өтті.