Ұлттық банк базалық мөлшерлемені бұрынғы деңгейде қалдырды

Ұлттық банк Қазақстандағы базалық мөлшерлеме бойынша жаңа шешімді жариялады. Бұрынғы деңгейде сақталыпты. Бұл туралы Stan.kz ақпарат агенттігі хабарлайды.

Базалық мөлшерлеме +/- 1 пайыздық тармақ дәлізімен жылдық 16,5% деңгейінде белгілеу туралы шешім қабылданды.

"Шешім нақты деректерді талдауды, жаңартылған болжамдарды және инфляциялық тәуекелдердің теңгерімін бағалауды ескере отырып қабылданды", – делінген хабарламада.

Ұлттық банктің мәліметінше, мамыр айының соңында жылдық инфляция 11,3%-ға жетті. Бағаның өсуінің негізгі драйвері реттелетін тарифтердің де, нарықтық қызметтердің де құнының айтарлықтай өсуіне байланысты қызмет көрсету инфляциясы болып қала береді.

Бағаның өсу қарқыны азық-түлік тауарлары бойынша да байқалады. Мамырдағы айлық инфляция тарихи динамикадан айтарлықтай асып, 0,9% болды. Базалық және маусымдық түзетілген инфляция көрсеткіштері – жылдық мәнде сәйкесінше 10,1% және 11,4%.

"Мұның барлығы тұтынушылық сұраныстың жаңаруы, өндіріс шығындарының өсуі және бағаларға қысымның жалғасуын көрсетеді. Халықтың инфляциялық болжамы мамырда 14,1% өсті, бұл құбылмалылық пен болашақ инфляцияға қатысты белгісіздікті көрсетеді", – делінген хабарламада.

Ұлттық банктің мәліметінше, бағаға сыртқы сектор тарапынан қысым күшейіп келеді. Бұған Ресейдегі тұрақты жоғары инфляция, жоғары сұраныс пен валюталық ауытқулар жағдайында азық-түлік өнімдерінің бағасының өсуі, сондай-ақ сауда қақтығыстарының күшеюі әсер етті.

"Жаһандық баға өсімі тұрақты болып қалады. Саудадағы келіспеушіліктер инфляциялық тәуекелдерді арттырады және өнеркәсіп пен қызмет көрсету секторындағы іскерлік белсенділікті тежейді. Базалық сценарий аясында Brent маркалы мұнай бағасы болжамды кезеңнің соңына қарай орташа есеппен барреліне 60 долларға дейін төмендетілді. Сценарийлік шарттар нақты баға серпінін және мұнай нарығындағы ұсыныстың сұраныстан күтілетін асып кетуін ескере отырып түзетілді", – деп хабарлады Ұлттық банк.

Инфляция болжамы
2025 және 2026 жылдарға инфляция болжамы қайта қаралғаны атап өтілді. 2025 жылы 10,5-12,5%, 2026 жылы 9,5-11,5% шегінде болады деген болжам бар. 2027 жылдың соңына қарай шектеуші ақша-несие саясаты және алдағы фискалдық шоғырландыру шеңберінде бюджеттік қолдау шараларын кезең-кезеңмен қысқарту нәтижесінде инфляция 5,5-7,5%-ға дейін төмендейді.

Қазақстанның 2025 жылға арналған экономикалық өсу болжамы ішкі сұраныстың күшеюі мен инвестициялық белсенділіктің артуына байланысты 5-6%-ға дейін көтерілді.

2026 жылға арналған болжамалдыңғы болжаммен салыстырғанда мұнай бағасының төмендеуі сценарийі есебінен экспорттың төмендеуін ескере отырып, 4-5% болады. 2026 жылы экономикалық өсім ішкі сұраныс пен мұнай өндіруді ұлғайту есебінен қамтамасыз етіледі.

"Жалпы қалыптасып келе жатқан жоғары инфляция бұрын болжанған уақыттан ұзақ мерзімге қалыпты қатаң ақша-кредит шарттарын сақтауды талап етеді. Тәуекелдер тепе-теңдігі 2025 жылдың соңына дейін ағымдағы деңгейде базалық мөлшерлемені ұстап тұрудың жоғары ықтималдылығын айқындайтын инфляцияға қарай жылжыды.

Ағымдағы жағдайларды сақтау инфляциялық күтулерді тұрақтандыруға, баға өсімін жеделдету үрдісінің шоғырлануын болдырмауға және инфляцияның орта мерзімді мақсатты 5%-ға қарай тұрақты төмендеу траекториясына қайтарылуына бағытталған", - деп толықтырды баспасөз қызметі.

Сонымен қатар Ұлттық банк қажет болған жағдайда базалық мөлшерлемені көтеру мүмкіндігін жоққа шығармады.