Венгрияда 42 көлік соқтығысқан ірі жол апаты орын алды
Венгрия астанасы Будапешттен 20 шақырым жерде М1 тасжолында 42 көлік соқтығысып, ірі жол апаты орын алды. Оның 5-еуі — жүк көлігі, 37-сі — жеңіл көлік деп хабарлайды Stan.kz ақпарат агенттігі.
Будапешт полиция басқармасы апат салдарынан 19 көлік жанып кеткен, 40-қа жуық адам жарақат алғанын мәлімдеді.
"Ауруханаға 39 адам жеткізілді. Оның 29-ы ересек адам, 10-ы — бала. 10 ересек адам ауыр жарақат алған, 19-ы жеңіл жараланған. 4 бала ауыр жарақат алса, 6 бала жеңіл жарақат алған" – деді Ұлттық жедел жәрдем қызметінің баспасөз хатшысы Павел Дьёрфи.
Жарақат алғандарды эвакуациялау үшін 4 тікұшақ, 16 жедел жәрдем көлігі жұмылдырылған. Жедел жәрдем бригадалары Будапешттен ғана емес, Дьера, Татабаньи және Секешфехервара секілді басқа қалалардан да келген.
Полиция апатқа қатты жел тұрып, құмды дауыл соққандықтан, жолдың көрінбей қалуы себеп болғанын хабарлады.
М1 тасжолы— Австрияға қарай бастайтын автожол. Қазір ол екі бағытта да жабық тұр.
Талқылау