“Вагнер” ЖӘК бұрынғы жауынгері халықаралық Гаага сотында Ресей Федерациясына қарсы куәлік бермек
“Вагнер” жеке әскери компаниясының (ЖӘК) бұрынғы әскериі және жауынгер Игорь Саликов Гаагадағы Халықаралық қылмыстық сотқа қатысу үшін Нидерландыға келді. Саликов Ресей қарулы күштерінің Украинаның бейбіт тұрғындарына қарсы жасаған қылмыстары туралы ақпаратпен бөлісуді жоспарлап отыр. Бұл туралы нидерландылық EenVandaag телебағдарламасындағы сұхбатта айтылды, деп хабарлайды Stan.kz ақпарат агенттігі.
Ресей армиясының полковнигі Саликов “Вагнер” ЖӘК құрамына тұрақты әскер қатарынан ауысып келген. Ол бөлімше құрамында Сирияда және Африканың бірқатар елдерінде соғысқан. Ер адам сонымен қатар 2014 жылы Донецк және Луганск облыстарындағы соғыс кезінде де, 2022 жылғы ақпанда жаппай басып кіруден кейін де Ресейдің Украинаға қарсы әскери операцияларына қатысқан.
Саликовтың айтуынша, әскери қызметкерлерге тапсырмалар Мәскеудегі Ресей қорғаныс министрлігінен, кейде тіпті президент Владимир Путиннің кеңсесінен де келіп түскен. Ол қылмыстық операцияларға барлау қызметтері, соның ішінде Ресей Федерациясының Сыртқы барлау қызметі мен Ресей Федерациясының Федералдық қауіпсіздік қызметі қатысқанын мәлімдеді.
Экс-вагнерші сонымен қоса "ДХР" тәуелсіздігі туралы референдумның бұрмаланғанына назар аударып, "дұрыс" нәтижеге қол жеткізу үшін сайлау комиссиясының лауазымды тұлғаларына қысым мен физикалық күш қолданғанын жариялады. Саликовтың айтуынша, Кремль пара, бопсалау және дауыс беру нәтижелерін бұрмалауды пайдаланған. Бұрынғы жалдамалы ресейлік әскери қызметкерлер 2014 жылы Украинадағы "ұлтшылдық қайта өрлеуге" сеніп, алданып қалғанын атап өтеді.
Ер адам сондай-ақ көптеген бейбіт тұрғындардың, соның ішінде балалардың өліміне себеп болған Донецктің тұрғын аудандарында миналар орнатылғаны туралы айтты. Ол Украина қарулы күштерін елдің орыстілді азаматтарына зорлық-зомбылық көрсетті деп айыптау үшін осындай әрекеттердің қажет болғанын түсіндіреді. Сондай-ақ, оның айтуынша, ресейшіл сепаратистер Донецкті атқылаған.
“Мен бейбіт тұрғындарға жасалған сұмдық қиянаттың куәсі болдым”, – дейді Саликов 2022 жылдың ақпанынан кейінгі Украинадағы жағдайға түсініктеме беріп.
Бұрынғы жалдамалы сарбаздың айтуынша, ресейлік тарап әскери тұтқындарды өлім жазасына кесіп, азаптауды жүзеге асырған. Саликов балаларды ұрлауды да өз көзімен көрген – арнайы қызмет кәмелетке толмаған балаларды Беларусь шекарасы арқылы шығарған.
Игорь Саликов Украинада бейбіт тұрғындарды өлтіру туралы бұйрықты орындаудан бас тартқанын мойындады. Осы себепті ол әскери сотқа жіберілген, бірақ ол Ресейден қашып құтылады.
2023 жылдың наурызында Халықаралық қылмыстық сот Путин мен Ресейдің балалар құқықтары жөніндегі уәкілі Мария Львова-Белованы мыңдаған украиндық баланы "қайта тәрбиелеу" мақсатында Ресей аумағына заңсыз тасымалдағаны үшін қамауға алу туралы ордер берген.