"Үшеуі өз еркімен жұмыстан кетуге мәжбүр болған": Маңғыстаулық полицейлер командирінің қысым көрсеткеніне шағымданды
Фото: Depositphotos.com
Маңғыстау облысы полиция департаментінің оқу-жаттығу ротасының қызметкерлері өз командирі, полиция майоры Мақсат Айғелдиевке қатысты ұжымдық шағым түсірді. Бұл туралы Stan.kz ақпарат агенттігі “Лада” басылымына сілтеме жасап хабарлайды.
Рапорттағы мәліметке сенсек, 2024 жылдың қарашасында Мақсат Айғелдиев қызметке тағайындалғаннан кейін бөлімшеде жаппай жұмыстан шығарулар, қысым көрсету және қызметтік әдепті бұзу жағдайлары бола бастаған.
Қызметкерлердің айтуынша, үшеуі өз еркімен жұмыстан кетуге мәжбүр болған. Тағы екеуі жұмыстан шығарылу қаупінде тұр. Бұдан бөлек жеке құрамның шамамен 80%-ы заңсыз ақша жинаудан және басшылыққа сыйлық беруден бас тартқаны үшін қудаланған.
Сонымен қатар қызметкерлер біліктілік талаптарына сай келмейтін адамдардың басшылық қызметке тағайындалғанын, жиі қорлау мен ар-намысты таптау фактілері болғанын мәлімдеді. Бұл жағдайлар моральдық-психологиялық ахуалдың күрт нашарлауына әкелген.
Бұдан бөлек Айғелдиев 2024 жылғы 31 наурыз бен 2 сәуір аралығында себепсіз түрде Астанада болып, жұмыс орнында болмағаны айтылған. Бұл деректі "Бүркіт" базасының мәліметтері мен ұшу билеттері арқылы растауға болады.
Қызметкерлер видео, қаржылық құжаттар мен өзге де дәлелдердің бар екенін айтып, қызметтік тергеу жүргізуді сұрап, командирді ауыстыруды талап етіп отыр. Олар полициядағы қызметін жалғастыруға дайын екендерін, бірақ басшылықтың ауысуын қажет деп санайтынын жеткізді.
Бұл жағдайға байланысты Маңғыстау облыстық полиция департаменті қызметтік тексеріс басталғанын растады.
"Келтірілген ақпаратқа жан-жақты баға беріледі. Тексеру барысы департамент басшылығының бақылауында", – деп хабарлады ведомство.
Қостанай облысында қызметкер салынып жатқан тұрғын үйді сынағаны үшін жұмыстан шығарылды
Еске салайық, бұған дейін Абай облысы Қарауыл ауылына қарасты Абай атындағы мектеп-гимназия-интернатының мұғалімдері директор Роллан Тлеухановтың заңсыз әрекеттеріне шағымданды. Ұстаздар қара жұмысқа мәжбүрленіп, ай сайын ақша жинауға, директордың жеке шаруасына көмектесуге міндеттелген. Директор мен оның екі ұлы сабақ өтпесе де, жалақы алады. Асхана мен көлік шаруалары да оның отбасының пайдасына жұмыс істейді. Мұғалімдер бұл заңсыздықтарды тиісті органдарға хабарлағанымен, шара қолданылмаған.

“Партизан болған, 400-ден астам жаралы сарбазды құтқарған”: Екінші дүниежүзілік соғыста ерлік көрсеткен қазақ қыздары кімдер
