Түркістан облысында жүкті әйелін қарағаны үшін фельдшерді соққыға жыққан ер адам қамауға алынды

Фото: gov.kz

Түркістанда жедел жәрдем қызметкерін ұрып-соғу фактісі бойынша қылмыстық іс қозғалды. Жүкті әйелді қарауға барған фельдшерді науқастың қызғаншақ күйеуі аяусыз соққыға жыққан. Қазір фельдшер травматология бөлімшесінде ем қабылдап жатыр. Бұл туралы Stan.kz ақпарат агенттігі КТК арнасына сілтеме жасап хабарлайды.

Қызметкері соққыға жығылған Түркістан облыстық жедел жәрдем станциясы басшылығы фельдшерге жұдырық ала жүгірген ер адам мен фельдшердің туыстары өзара келісімге келгенін жеткізген еді. Алайда құқық қорғаушылар оқиғаны егжей-тегжейлі тексеруді ұйғарған. Түркістан облысы полиция департаментінің бастығы істі жеке бақылауына алған.

"Түркістан қаласында медициналық қызметкерді қызмет көрсету кезінде соққыға жығу дерегі бойынша қылмыстық іс қозғалды. Күдікті ұсталып, уақытша ұстау изоляторына қамалды. Полицейлер "заң және тәртіп" қағидатын іске асыру аясында заңға қайшы әрекеттер үшін жаза қолданылмай қоймайтынын атап көрсетеді. Іс менің жеке бақылуымда", – деп мәлімдеді Түркістан облысы полиция департаментінің бастығы Мұрат Қабденов.

Еске салсақ, бұған дейін Түркістан облысында шақырту бойынша жүкті әйелді қарауға барған 26 жастағы фельдшер соққыға жығылып, ауруханаға түскенін жазған едік. Жанына тәжірибеден өтіп жүрген қызды ертіп алып, шақыртуға барған фельдшер Құдырет Мүтәліпов соқыр ішектен күдіктеніп, аяғы ауыр келіншектің ішін ұстап тексерген. Мұнысы күйеуіне ұнамай қалған. Әйеліне бөтен ерекектің қолы тигеніне ашуланған ол фельдшерді аямай ұрып тастаған. 

Науқастың күйеуінен таяқ жеген жедел жәрдем қызметкері ауыр соққылардан уақытша есін жоғалтқан. Оқиға болған күн мүлдем есінде жоқ. Дәрігерлердің айтуынша, науқас екі аптадай емделуі керек.