Алматылықтар үшін бүгінгі түн қауіпсіз бе – Сейсмологтар жауап берді
Сейсмологтар бүгін түнде Алматыда жер сілкінісі қайталануы мүмкін бе деген сұраққа жауап берді. Бұл туралы Stan.kz ақпарат агенттігі хабарлайды.
Алматыда өткен брифингте Сейсмология институты мен Төтенше жағдайлар департаментінің өкілдеріне алматылықтар бүгін қатты жер сілкінісінен қорықпай, үйде қауіпсіз бола ала ма әлде қала сыртында немесе қабылдау пункттерінде күту керек пе деген сұрақ қойылды.
"Біздің сейсмикалық қауіпті аймақта тұратынымызды түсіну керек. Жер сілкінісі үнемі болып тұрады. Мен өзім үйден қашпай, үйде отыруды жоспарлап отырмын", – деді Сейсмологиялық бақылаулар және зерттеулер ұлттық ғылыми орталығының директоры Дәулет Сәрсенбаев.
Сондай-ақ Алматы Төтенше жағдайлар департаменті сағат 15:00-де сейсмикалық жағдайды бағалау комиссиясының шешімі негізінде тұрғындардың тұрғылықты жерлеріне оралуы мүмкін екенін хабарлады. Афтершок болуы мүмкін, бірақ олар қауіп төндірмейді.
Сондай-ақ журналистер Түркиядағы жер сілкінісінен кейінгідей күшті афтершок болу мүмкіндігін де нақтылап көрді.
"Түркияда Оңтүстік Анадолы жарығы бойында негізгі жер сілкінісі болған соң, артынша афтершоктар жалғасты. Бұл осы аймақтағы жер қыртысының ерекшеліктеріне және онда жинақталған шиеленістерге байланысты. Біздің жағдайда дәл осындай жағдай Қырғызстанның, Қытайдың шекаралық аумағында, бұл көз 17 класс энергиясының бөлінуімен негізгі дүмпуден кейін, кейінгі сілкіністер негізгі сілкіністің күшінен аспады", – деді Сейсмологиялық бақылаулар және зерттеулер ұлттық ғылыми орталығының директорының орынбасары Нұрсәрсен Өзбеков.
Айта кетейік, бұған дейін желіде түнгі сағат 12:00 мен таңғы 6:00 арасында жер сілкінісі болуы мүмкін деген ақпарат тарағаны туралы жазған едік.