Brent crude маркалы мұнайдың бір баррелінің бағасы Америка президенті Дональд Трамптың Ирандағы соғыс “іс жүзінде аяқталуға жақын” деген мәлімдемесінен кейін 100 доллардан төмен түсті. Бұл туралы Stan.kz ақпарат агенттігі Bloomberg басылымына сілтеме жасап хабарлайды.
“Трамптың АҚШ-тың Иранға қарсы соғысы жақын арада аяқталуы мүмкін екенін меңзегенінен кейін мұнай бағасы түсті. Ол операция жоспардан да жылдам жүріп жатқанын айтты. Бұл мәлімдеме мұнай бағасының күрт өсуі аясында қысым күшейген тұста жасалды”, – деп жазды басылым.
Бұған дейін “қара алтынның” бағасы бір баррелі үшін 119-120 доллар шамасында саудаланып, 2022 жылы маусымнан бері ең жоғары деңгейге жеткен еді. Алайда бірнеше сағаттан кейін баға шамамен 99 долларға дейін төмендеп, кейін 83 долларға дейін құлдырады. Мақала жарияланған сәтте осы марканың бір баррелінің бағасы қайта түзетіліп, 89 долларға дейін көтерілді.
Deutsche Welle мәліметінше, энергетикалық дағдарыс кезінде Group of Seven елдерінің қаржы министрлері мұнай қорларының бір бөлігін босатуға дайын екенін жеткізген.
“Біз қажет шараларды қабылдауға дайынбыз, оның ішінде мұнай қорларының бір бөлігін босату арқылы жаһандық энергия ресурстарын жеткізе аламыз”, – делінген министрлердің бірлескен мәлімдемесінде.
- Таяу Шығыстағы қақтығыс теңге мен мұнай бағасына қалай әсер етеді: Жұманғарин жауап берді
- Израиль алғаш рет Иранның мұнай қоймаларына соққы жасады
Сонымен қатар Франция тарапы АҚШ пен Израильдің Иранға қарсы соғысына байланысты ұлттық мұнай қорларының бір бөлігін пайдалану туралы шешім әзірге қабылданбағанын ескертті.
Group of Seven елдерінің кездесуіне сондай-ақ International Energy Agency басшысы Fatih Birol қатысты. Ол министрлерге әлемдік мұнай нарығындағы жағдайдың нашарлап бара жатқанын айтқан.
Бұған дейін мұнай бағасы кейінгі 1,5 жылдағы ең жоғары деңгейге жеткенін жазған едік.
