Трамп Ресейдің Украинаға қарсы соғысын “Екінші дүниежүзілік соғыстан кейінгі ең сұмдық соғыс” деп атады.
“Егер ол жалғаса берсе, ауқымы жағынан одан да асып түсуі мүмкін. Қаза тапқандардың саны адам шошытады. Олар бұл туралы айтқысы келмейді. Украина да, Ресей де өте көп адамнан айырылды”, – деді ол.
Сонымен қатар Трамп Украинадағы бейбіт реттеу шараларын Еуропа елдері мен НАТО қабылдауы тиіс деп пікір білдірді. Себебі АҚШ бұл қақтығыстан алыс орналасқан және оған ешқандай қатысы жоқ.
“Мен бұл соғыспен бір жылдан бері айналысып келемін, осы уақыт ішінде сегіз өзге қақтығысты реттедім. Үндістан-Пәкістан, Армения-Әзербайжан және басқа да соғыстар”, – деді ол.
Трамптың айтуынша, екі елдің келісімге келуінен АҚШ ештеңе ұтып отырған жоқ.
“Бізге не тиді? Өлім, қирау және біздің көмегімізді бағаламайтын адамдарға кетіп жатқан орасан көп ақшадан басқа ештеңе жоқ. Мен НАТО, Еуропа туралы айтып отырмын. Украинамен солар айналысуы керек, біз емес”, – деп атап өтті Трамп.
