Трамп Иранмен соғыс жақын арада аяқталатынын мәлімдеді

Фото: bbc.com

АҚШ президенті Donald Trump Ақ үйде журналистермен кездесуі кезінде Иранға қарсы соғысы "алдағы 2-3 апта ішінде" аяқталуы мүмкін екенін айтты. Бұл туралы Stan.kz ақпарат агенттігі DW.com басылымына сілтеме жасап хабарлайды.

Трамптың айтуынша, Тегеранмен келісім жасалмаса да, Иранға жасалып жатқан шабуылдар тоқтатылады.

"Оларда режим өзгерді. Бұл менің жоспарымда болмаған. Менің бір ғана мақсатым болды. Олардың ядролық қаруға ие болуына жол бермеу және бұл мақсат орындалды... Біз жұмысты аяқтап келеміз, менің ойымша, бұл шамамен екі аптаға созылады, мүмкін тағы бірнеше күнге ұзарар. Бірақ біз олардағы барлық мүмкіндікті жойғымыз келеді", – деді Ақ үй басшысы.

АҚШ президенті келісімге қол жеткізілсе, соғыс одан да ертерек аяқталуы мүмкін екенін айтты. Оның сөзінше, Иран билігі бұған "өте мүдделі". Алайда Трамп келісімнің бар-жоғы "маңызды емес" екенін де атап өтті. Сондай-ақ ол Иран ұйымдастырған Ормуз бұғазының, әсіресе еуропалық кемелер үшін, жабылуы басқа елдердің мәселесі екенін айтты.

"Егер Франция немесе басқа елдер мұнай не газ алғысы келсе, олар Ормуз бұғазы арқылы өздері өтіп, өз қауіпсіздігін өздері қамтамасыз етуі керек. Бұғаздағы жағдай бізге қатысты емес", – деді ол.

Трамп Таяу Шығыстағы соғыс пен Ормуз бұғазының жабылуына байланысты мұнай бағасының 50 пайызға күрт өсуіне пікір білдірді. Оның айтуынша, АҚШ Иранға қарсы шабуылдарды "жақын арада" тоқтатқан соң, бағалар күрт төмендейді.

АҚШ пен Израиль 28 ақпаннан бастап Иранға әуе соққыларын жасап келеді. Соның салдарынан Иранның жоғарғы көшбасшысы аятолла Ali Khamenei және бірқатар жоғары лауазымды шенеуніктер мен күштік құрылым өкілдері қаза тапқан.

Иран бұған жауап ретінде Израиль мен Парсы шығанағы елдеріне зымырандар мен дрондар арқылы соққы беруде. Ислам Республикасы шабуылдардың мақсаты өңірдегі америкалық әскери базалар екенін мәлімдеді. Сонымен қатар Иран шабуылдары Парсы шығанағындағы мұнай қоймалары мен мұнай танкерлеріне де бағытталған.

• Мұнай бағасы 200 доллар болған жағдайда Қазақстан экономикасына не болады

• АҚШ Иранмен байланысты соғыс шығындарын араб елдері төлегенін қалайды

Еске салайық, бұған дейін АҚШ президенті Donald Trump Иранмен қақтығыс аясында елдің мұнай инфрақұрылымын, әсіресе негізгі экспорт нүктесі Харк аралын бақылауға алу мүмкіндігін қарастырып отырғанын мәлімдеді. Сонымен қатар Пентагон құрлықтағы операцияларға дайындалып жатқаны айтылды, бірақ оны мақұлдау мәселесі әлі нақты емес.