Тоқаев кәсіпкерлерді ауылда үй салуға шақырды

Мемлекет басшысы Қасым-Жомарт Тоқаев отандық кәсіпкерлерді ауылдық елдімекендерде тұрғын үй салуға шақырды, деп хабарлайды Stan.kz ақпарат агенттігі. 

"Былтыр тұрғын үй құрылысының қарқыны 11,2 пайызға өсті. Бұл - жақсы көрсеткіш. Халықтың тұрмыс сапасын арттырудың басты шарттарының бірі – тұрғындарды қолжетімді баспанамен қамтамасыз ету. Біз осы маңызды мәселені шешу үшін ауқымды шаралар қабылдап жатырмыз. Қазір азаматтарымыз өзінің зейнетақы жинағының бір бөлігін тұрғын үй жағдайын жақсартуға пайдалана бастады. Бұл бұрын-соңды болмаған теңдессіз қадам. Кәсіпкер өз жұмысшыларына арнап ауылда үй салса, мемлекет оған кеткен шығынның 50 пайызына дейін қайтаратын болады. Бұл қай жағынан алып қарасақ та, бәріне пайдалы", - деді президент. 

Айта кетейік, бүгін елордада ҚР президенті Қасым-Жомарт Тоқаевтың қатысумен Ұлттық қоғамдық сенім кеңесінің бесінші отырысы өтіп жатыр.