Транзит пен логистика мәселесі: Тоқаев қауіпсіздік кеңесінің отырысын өткізді
Президент Қасым-Жомарт Тоқаевтың төрағалығымен қауіпсіздік кеңестің отырысы өтті. Бұл туралы Stan.kz ақпарат агенттігі хабарлайды.
Жиында еліміздің көлік-логистика әлеуетін жүзеге асыру барысында кездесетін стратегиялық сын-қатерлер қарастырылды.
Мемлекеттік органдар мен ұлттық компаниялардың басшылары теміржол, автомобиль, теңіз, әуе көліктері, сондай-ақ құбыр арқылы тасымалдау бағыттарындағы мәселелерді шешуге бағытталған жұмыстар жөнінде баяндама жасады.
“Транзиттік жүк тасымалын, соның ішінде транскаспий халықаралық көлік бағдары арқылы тасымалдау ісін дамытудың өзектілігіне назар аударылды. Президент отандық өнімдерді экспорттау үшін транспорт әлеуетін ұлғайту маңызды екенін атап өтті. Ол үшін инфрақұрылымдық шектеулер мен басқа да кедергілерді жойып, көлік-логистика қызметінің сапасын арттыру және тариф қалыптастыру жүйесін жетілдіру қажет”, – делінген ведомоствосында.
Жиын барысында өнеркәсіп, экспорт және транзит әлеуетін қатар дамыту, инфрақұрылым құрылысының заманауи стандарттарын енгізу және көлік-логистика саласының экономикаға мультипликативті әсерін қамтамасыз ету мәселелеріне айрықша мән берілді.
Кеңес қорытындысы бойынша президент үкіметке бірқатар нақты тапсырма берді.