Тіс емдету, көзді лазерлік түзету: Қазақстандықтар зейнетақы жинағын қандай медициналық қызметтерге қолдана алады

27 сәуірден бастап Қазақстанда жинақталған зейнетақы қаражатын стоматологиялық қызметке, оның ішінде тіс протездеу мен имплантациялауға, сондай-ақ балаларын емдеу үшін жұмсауға мүмкіндік беретін жаңа ережелер күшіне енеді. Бұл туралы Stan.kz ақпарат агенттігі хабарлайды.

Фото: Pixabay.com

Денсаулық сақтау министрінің 9 сәуірдегі бұйрығымен емделуге арналған біржолғы зейнетақы төлемдерін пайдалану қағидаларына өзгерістер енгізілді.

Қаражатты пайдалану үшін БЖЗҚ-дан жинақтың қолжетімді сомасы туралы ақпаратты алу керек. Жұбайы немесе жақын туыстары зейнетақы жинақтарын пайдаланғысы келсе, жеке кабинет арқылы шарт жасап, өзара қарым-қатынасты растау қажет.

Кәмелетке толмаған баласының еміне де қорды пайдалануға болады.

• Қазақстандық мектептерде стоматологиялық кабинеттер ашылмақ

• Қазақстанда зейнетақы жинақтары есебінен тіс емдеуге шектеу қойылмайтын болды

Әрі қарай қаражатты алушы емхананы таңдайды (соның ішінде шетелдегіні де). Емделу қажет пе деген шешім қабылдайтын дәрігерлік-консультациялық комиссиядан өту үшін өз емханасына барады.

Стоматологиялық қызметтерді алу үшін:

• Тістерді емдеу жоспарын, рентгенді комиссия қарастырады. Олар емхананың лицензиясын тексеріп, рұқсат береді. 
• Егер имплантант салу керек болса, дейін және кейін рентгенге түсу керек. Протездерді орнату кезінде жұмыс алдында және жұмыстан кейінгі фотоны көрсетеді.
• Комиссиядан кейін науқас медициналық ұйыммен келісімге қол қояды, оны жеке шотқа тіркейді және оператордан ақша аударылғанын күтеді.

“Шетелде медициналық қызметтерді алу кезінде шот-фактура және медициналық ұйым мен науқас арасында жасалған медициналық қызмет көрсету шартын көрсете отырып, төлемді жүзеге асыру үшін қажет құжатты ұсынады”, — делінген құжатта.

Барлық құжатты тапсырғаннан кейін оператор 5 жұмыс күні ішінде медициналық ұйымның шотына ақша аударады. Төлем екі кезеңде жүзеге асырылады: емдеу басталғанға дейін және протез, имплантты түпкілікті орнатқанға дейін.

Қажет құжаттар 45 жұмыс күні ішінде ұсынылмаса, ақша БЖЗҚ-ға қайтарылады. Шетелде емделген жағдайда ақша бағамы ескеріле отырып қайтарылады.

Жинақталған зейнетақы қаражатын қандай ем үшін қолдануға болады:

• Орфанды ауруларды емдеу, оның ішінде оларды дәрі-дәрмекпен қамтамасыз ету, сондай-ақ емдеу тактикасын айқындау мақсатында диагностикалық зерттеулер жүргізу;
• Қазақстан аумағында орналасқан медициналық ұйымдарда көрсетілетін стоматологиялық қызметтер (тісті протездеу, имплантациялау);
• Отадан кейінгі тыртықтарды және туа біткен ақауларды, сондай-ақ мастэктомиядан кейін түзету мақсатында қалпына келтіру оталары (пластикалық);
• Радионуклидті және радиойодты терапия;
• Радиохирургиялық емдеу (гамма-пышақ, кибер пышақ);
• Протонды терапия;
• Офтальмологиялық қызметтер (мүйіз қабықшаның коллагендік кросслинкингі, лазерлік түзету).

Өзгерістер 27 сәуірде күшіне енеді.

Айта кетейік, денсаулық сақтау министрлігі тіс емдеу үшін зейнетақы жинақтарын алу ережелерін жаңартқан еді.