Соңғы жаңалықтар
Соңғы жаңалықтар

TikTok-та қайын атасымен билеген қазақстандық келін сынға қалды

Әлеуметтік желілерде атасымен жұлқына билеген келін, жастармен жарысқан кейуананың видеосы тарап жатыр. Біреулер мұны жөнсіз желікпелік десе, енді бірі заманға сай әрекет деп ақтап әлек. Көз үйренбеген көрініс жастар қауымына ұнап жатқанға ұқсайды. Ал мамандар болса мұндай үрдістің соңы қазақы тәрбие мен ұлттық нақыштың ұмытылуына алып келеді дейді. Бұл туралы Stan.kz ақпарат агенттігі "Еуразия бірінші" арнасына сілтеме жасап хабарлайды.

Трендтен қалыспай, немерелерінің жаңа ермегін түсінгісі келгендер арасында Серікқазы ата мен Күлзия апа да бар. Отасқандарына 50 жыл болған қариялар басты мақсат танымал болу емес, керісінше тиктоктан бас көтермей, күні-түні телміріп отырған жастарға отбасылық береке бірлікті насихаттау дейді.

"Біз сияқты ата-әжесі бар екенін, танымайтын адамдарға көрсеткісі келген шығар. Жақсы жағынан көрсетіп жатса, неге қуанбасқа ? Балаларға тәлім-тәрбие көрсету үшін, жас кезден анау 60-70-ші жылдарда қандай болдық? Содан бері қол ұстасып келе жатырмыз", - деді зейнеткер Күлзия Данабаева.

Ал Серікқазы ата әлеуметтік желі арқылы жеткіншектерге қарияларды сыйлау керектігін түсіндіргісі келетінін айтады.

"400 мың көрермендеріміз бар, бәрі құттықтап, сөйлеп жатыр. Жаман сөз айтылған жоқ, жақсы сөздер ғана айтылып жатыр. Бұның мән-мағынасы келешек қазақ ұрпақтарының дұрыс болғанын қалаймыз. Табыс көзін жасап отырғанымыз жоқ. Біздің мақсатымыз - ұрпақтың тәрбиесіне мән беру. Келешек ұрпақтың осындай атасы мен апасы бар екенін көріп жүрсе екен. Үлкенді сыйласа екен, үлкеннің қадірін тани білсе, үлкеннің қадірін арттыра білсе...", - дейді зейнеткер Серікқазы Байқоңыров.

TikTok-те жұртты таң қалдырған тағы бір видео - қайын атасы мен келінінің биі. Мөлдір Ошақбаева көңілденіп жүретін қайын атасын TikTok-қа түсуге ұсынысты өзі жасаған. Тіпті, қайын ата мен келін биін бірінші болып енгізген де өзі.

"Әрине, бұл ерсі көрінеді, бұндай нәрсе қазақта болмағандықтан , көздеріне ерсі көрінеді. Бұл не сұмдық! Біз қайынатамызбен тикток түсірмек түгілі бетіне тіке қарамаймыз, бір дастарқанда отырып шәй іше алмаймыз деген пікірлер келіп жатты. Қазақы әдет-ғұрыпты сақтаған қайын ата мен келіннің арақатынасы бар. Басымда орамалым, үстімде халатым, азанда тұрған соң сәлемімді салып, шәйін беріп, осындай қарым-қатынас, ұйымшыл қарым-қатынастамыз", - деді блогер Мөлдір Ошақбаева.

"Тоғызыншы қыркүйек туған күнім еді, көңілді кештің аяғы тикток түсірумен аяқталды. Отбасымызбен содан бері тикток түсіреміз. Биді тез үйрендім, себебі жастайынан өнерге құштарлығым бар", - деді TikTok қолданушысы Болат Драмқұлов.

Ал психологтардың TikTok-қа қатысты пікірі қақ жарылады. Мәселен Ақгүл Молдабекованың пайымынша, мұндай видеолар психологиялық тұрғыдан кері әсерін тигізеді.

"Әрине бұл өзекті проблема. Бір жағынан ол ұлттық нақышқа нұқсан келтіреді. Екінші жағынан санаға осындай ой қалыптастырады. Онсызда еліктеуі көп халықтың ішінде психологиялық аспектінің итермелеуіне алып келеді", - деді психолог Ақгүл Молдабекова.

Дегенмен вайнерлердің психологтармен келіскісі жоқ. Айтуларынша, қайын ата мен келіннің арасындағы бірлестік отбасындағы атмосфераны нығайтып, керісінше бір-біріне деген сыйластықтары артады.

"Менің ойымша оның қазір жаман несі жоқ деп ойлаймын. Ағасымен түсірсін, інісімен түсірсін. Әпкесімен түсірсін. Өйткені бұл жақта отбасы ғой. Отбасы егер қолдап тұрса, бәрін де істеуге болады. Бәрін жасап көруге болады", - дейді вайнер Нұрдаулет.

Ал зейнеткер Жамал әже келін мен қайын ата арасындағы қазіргі қарым-қатынасты құптамайды. Өйткені бұрынғы келіннің сипаты өзгерек болған, дейді ол.

"Ата-бабамыздан келе жатқан ата мен ененің алдында басын иіп, көзіне тіке қарамайтын. Сондықтан ол дұрыс емес. Біздің заманда қасына барып әңгімелесуге де ұялатын, сөйлеуге де ұялатын, билемек түгілі! Енемен сырласатын шығармыз, ене шеше сияқты ол түсінікті. Атаның бетіне қарауға ұят", - деді зейнеткер Жамал Бисекеева.

Қысқасы, танымал әлеуметтік желінің қолданушылар саны 500 миллионнан асты. Ал оның негізгі аудиториясы ретінде жасөспірімдер көшбасында тұр.  Десе де АҚШ, Үндістан, Еурпаның кей елдері TikTok-тан бас тартқан. Мамандардың зерттеуінше, әлгі желі жасөпірімдердің санасын улап, теріс бағытта тәрбиелейді екен.

 

Талқылау
Пікір
Қазір оқып жатыр
Çàãðóçêà...
Қазір оқып жатыр