Тибетте жер сілкінісінен опат болғандардың саны 95-ке жетті
7 қаңтарда Тибеттің Шигацзе аймағындағы Лхадзе уезінде жойқын жер сілкінісі болып, үйлер үйінді астында қалды. Жер сілкінісінен қаза тапқандардың саны 95-ке жеткен. Бұл туралы Stan.kz ақпарат агенттігі Nexta live арнасына сілтеме жасап хабарлайды.
Фото: CFP
Жерасты дүмпулері Непал, Бутан және Үндістанда да сезілді. Соңғы мәліметтерге сәйкес, Қытайдың Тибет автономиялық ауданындағы жер сілкінісінен кемінде 95 адам қаза тауып, шамамен 130 адам жарақат алды.
Айта кетейік, Қытай Халық Республикасының президенті Си Цзиньпин Тибетте болған қуатты жер сілкінісінен кейін ауқымды құтқару жұмыстары бастау туралы бірнеше тапсырма берді.
Еске салайық, бұған дейін Қытайдың Тибет аймағында болған жер сілкінісінен кемінде 53 адам қаза тауып, тағы 62 адам жарақат алғанын жаздық. Мәліметтерге сенсек, бастапқыда Қытайдың Орталық телеарнасы 9 адам қаза тапқанын хабарлады. Табиғи апат көптеген ғимараттардың қирауына әкелді. Құтқару жұмыстары ұйымдастырылып, апат аймағында халықты эвакуациялау жұмыстары басталды. Жер сілкінісі жергілікті уақыт бойынша 09:05-те (Астана уақытымен 06:05-те) тіркелді. АҚШ-тың Геологиялық қызметі магнитуданы 7,1 балл деп бағалаған, ал Қытайдың сейсмикалық орталығы магнитуданы 6,8 балл деп көрсетті.