Талдықорғандағы "ЦУМ" сауда үйінде өртеніп кетті: Тұрғындар атышулы Мәнізоровпен кездесуді талап етіп отыр
Фото: Stan.kz
Талдықорған қаласындағы Назарбаев даңғылы мен Біржан Сал көшесінің қиылысында орналасқан ЦУМ сауда үйінің бірінші қабатында өрт шықты. Бутиктердің төбе аралығында орын алған өрт салдарынан кәсіпкерлердің тауарына зиян келіп, дүкен басшылығымен байланыса алмай отыр. Бұл туралы Stan.kz ақпарат агенттігі хабарлайды.
Жетісу облыстық Төтенше жағдайлар департаментінің мәліметінше, өрт сөндірушілер 20 шаршы метр аумақтағы өртті дер кезінде сөндірген. Зардап шеккендер жоқ. Қазір өрттің шығу себебі анықталып жатыр.
Кәсіпкер Ләззат Әділбекова "ЦУМ" ашылған күннен бастап сауда жүргізіп келеді. Өртке жарық шамындағы қысқа тұйықталу себеп болған. Оның сөзінше, ғимараттың электр желісі құрылғалы бері мүлде ауыстырылмаған. Осы оқиғадан кейін көптеген саудагерлердің тауары күйіп, сатуға жарамсыз күйге түскен.
"Бұл жердегі желілер сауда үйі салынған уақыттан бері ауыстырылмаған. Мен осы жерде саудамен алғашқы күннен бастап айналысып келемін. Бастапқыда барлығымыз ақша жинап, сауда үйін салдық. Кешегі өрт кішкентай шамнан шықты. Ол қызып кетіп, төбені жандырды. Енді бәріміздің тауарларымыз күйіп қалды. Тіпті жарты бағасына да сата алмаймыз", – дейді кәсіпкер.
Оның айтуынша, саудагерлердің көпшілігінде үлкен несиелер бар. Өтемақы талап ету үшін арнайы комиссияның тексерісі қажет. Ал бұл процесс ұзақ уақыт алуы мүмкін. Сондықтан кәсіпкерлер өтемақы талап етпеуді шешкен.
"Кезінде бұл сауда үйі жарқырап тұрған, бірақ қазір бәсекелестік артты. Біз бұл орын үшін бұрынғыдай таласпаймыз. Сонымен қатар біздің келісімшартымыз жалға берушінің пайдасына ғана жазылғандай. Көпшілігі оны оқымаған, себебі осы жерде сауда жасағысы келген. Қазір тек бір талабымыз бар: егер қожайын жалға алу уақытын тоқтатса, біз барлығын өзіміз жасап аламыз. Алайда, бүгінгі кездесуге басшылық тарапынан ешкім келмеді", – дейді Ләззат Әділбекова.
Айта кетейік, ЦУМ сауда үйі Талдықорғанның қақ ортасында орналасқан беделді дүкендердің бірі. 2000 жылдардан бері қала тұрғындары оның иесі Бағдат Мәнізоров екенін біледі. Ол әр жылдары Алматы облысы әкімінің орынбасары, Алматы қаласының Алатау ауданының әкімі, бірқатар мемлекеттік басқармаларда басшылық қызмет атқарған.
2019 жылы Бағдат Мәнізоров аса ірі көлемде алаяқтық жасады деген күдікпен ұсталып, тергеуге алынған. Алайда, көп ұзамай Бас прокуратура қылмыстық істі дәлелдің жеткіліксіздігіне байланысты тоқтатты. Бұл жағдай қоғамда үлкен резонанс тудырып, кейбіреулер оны "тапсырыспен ұйымдастырылған іс" деп бағалады. 2020 жылы Мәнізоров өз еркімен қызметінен кеткеннен кейін, оның қазіргі қызметі туралы нақты ақпарат жоқ.
Stan.kz тілшісі ол кісіге қоңырау шалып көрді, алайда оның барлық нөмірі байланыс аясынан тыс жерде.
Айта кетейік, бұған дейін Батыс Қазақстан облысында жеке тұрғын үй өртеніп, 5 бала қаза тапқаны туралы жазған едік.
