Тұрғындардың қазір тұрып жатқан пәтерлерінде өрт шығу қаупі бар, себебі олар электр жылытқыштары мен көмір пештеріне от жағып жылынуға мәжбүр. Күніне кем дегенде үш шелек қара отын жұмсалады дейді.

Жергілікті тұрғындардың айтуынша бұл тұрғын үй 50-жылдары салынған. Сондай-ақ 90-жылдардың ортасына дейін кеңестік қазандықтармен жылытылып, кейін олар бөлшектелген. Содан бері тұрғындар тамақ әзірлеу, кір жуу және жуыну үшін газ баллондарын қолданатын көрінеді. Ал зейнеткердің айтуынша, әкімдікке қанша шағымданғанымен ешбір жауап ала алмаған.

"Тұрғын үй-коммуналдық шаруашылығы "Өзің қалағандай өмір сүр!" деп шығарып салды! Пештің кірпіштері құлап, қолдануға жарамсыз болып қалды. Содан кейін несие алып, электр қуатын пайдалана бастадым. Содан бері шығын да көп. Ай сайын 70 мың теңгені тек электр энергиясы үшін төлеймін", - деді тұрғын Роза Қуанышәлиева.

Тұрғындар көрші үйлерге орталықтандырылған жылу бір жыл бұрын орнатылғанын айтты. Бірақ бұл екі қабатты үйлердің тұрғындарына тек жылу ғана уәде етілген. Көктемде комиссия қажетті құрал-жабдықтарды орнататын орынды анықтап, тіпті жобасын жасаған. Бірақ жұмыс әлі басталған жоқ.

"2018 жылдан блок-модульдік қазандықтарды орнатуды бастадық. Қазіргі уақытта 35 блок-модульдік қазандық орнатылды. Мамыр айында жобалық-сметалық құжаттарды толтырып, мемлекеттік сараптамадан өткізуге ақша бөлінді. Біз мемлекеттік сертификаттар алған бойда жобаны – биыл аяқтаймыз, құрылыс-монтаж жұмыстарына өтінім береміз", - деді Талғар аудандық тұрғын үй-коммуналдық шаруашылық бөлімі басшысының міндетін атқарушы Айбек Ақылжанов.

Шенеуніктердің айтуынша, екі қабатты үйлерде жылу жүйесі келесі жылы күзде қосылады.

Талқылау