7 шағын ауданындағы 55 пәтерлі көпқабатты үй 2021 жылдың маусымында қолданысқа берілген. Тұрғындардың басым бөлігі пәтерлерін кепілдікке алған. Кеше, 7 тамыз күні болған жауынның салдарынан су барлық қабаттарға жетіп, үй жаңбыр астында қалды.

"Жауын қатты болған жоқ, ар кетсе жарты сағат шамасында жауған шығар. Әпкелерімнің бұл үйде тұрып жатқанына 2 жыл болып қалды. Жылдар бойы жинаған қаржысын банкке құйып, несиеге алған. Ал енді салған мердігер пәтерлерді жөндеп бермейміз дегенге келтірді" - дейді Майра Жаңылысқызы.

Жағдайдың мән-жайын Stan.kz тілшісі Талдықорған қаласы әкімдігінен білді. Шенеуніктердің айтуынша, мердігердің кепілдігі осыдан 2 ай бұрын аяқталып кеткен.

"Бұл үй 2021 жылы 30 маусымда пайдалануға берілді. Шарттық міндеттемелерге сәйкес мердігер ұйым пайдаланылатын құрылыс материалдарына және пайдалануға 2 жыл мерзімге кепілдік береді. Алайда мердігерлік ұйымның есебінен жөндеу-қалпына келтіру жұмыстарын жүргізу мүмкін емес, өйткені кепілдік мерзімі 2023 жылы 30 маусымда аяқталды" - деп хабарлайды Талдықорған қаласының әкімдігі.

Енді барарға жер таппай отырған тұрғындар дабыл қағуда. Олар үйдің құрылысын жүргізген мердігердің ұяты болса су астында қалған азаматтарға қол ұшын созады деп сеніп отыр.

Талқылау