Талдықорған-Өскемен жолының салынып жатқанына 5 жылдан асты: Жөндеудің аяқталу мерзімі белгілі болды
Талдықорғаннан Өскеменге баратын республикалық маңызы бар жол жақында қолданысқа берілмек. Бұл туралы Stan.kz ақпарат агенттігі хабарлайды.
Фото: Көлік министрлігі
Жөндеу жұмысы 2019 жылы басталған “Талдықорған-Қалбатау-Өскемен” жолы мемлекет басшысының назарында.
Жол еліміздің үш өңірі – Жетісу, Абай және Шығыс Қазақстан облыстарын байланыстырады.
Жолдың жөндеу барысын көлік министрі Марат Қарабаев тексерді.
“768 шақырым жолға толығымен асфальт төселді. Мамандар 40 көпір мен 6 өткел жөндеу жұмысын аяқтады. Бірқатар учаске биыл жазда пайдалануға беріледі. Жоба аясында Қойлық, Балапан, Шынқожа елді мекендері мен Аягөз қаласының айналма
жолдары салынды”, – делінген хабарламада.
Жолдың салынып жатқанына 5 жылдан асты.
Жолдың 16 учаскесінде 1 мыңға жуық маман мен 600 бірлік арнайы техника жұмылдырылған. Үшарал қаласының маңындағы көлік айрығындағы жөндеу аяқталуға жақын.
Жалпы нысан 2024 жылдың соңында дайын болып, халыққа беріледі деген жоспар бар.