"Кемшіліктерімді көрдім": Судья Айжан Құлбаева Бишімбаев ісінің өзіне қалай әсер еткенін айтты
Астананың қылмыстық істер жөніндегі мамандандырылған ауданаралық сотының төрағасы Айжан Құлбаева экс-министр Қуандық Бишімбаевқа қатысты сот процесі күнделікті тәртібін ретке келтіргенін айтады. Бұл туралы Stan.kz ақпарат агенттігі хабарлайды.
Фото: Жоғарғы сот
Айжан Құлбаева әйелін асқан қатігездікпен өлтірген экс-министр Қуандық Бишімбаевтың ісі өзін тәртіпке салғанын және бойындағы кемшіліктерін айқын көрсеткенін айтады. Оның сөзінше, қазір судья сол кемшіліктерін түзеу үшін жұмыс істеп жатыр.
“Судьяның жұмысы күйзеліске төзімді болуды, табандылықты, жақсы есте сақтау қабілетін және ұстамдылықты талап етеді. Судья тәулігіне 24 сағат судья болуы керек. Судья рөлінен ауысып кету қиын. Оның үстіне, судья әдебінің кодексі жұмыста да, жұмыстан тыс уақытта да соған сай әрекет етуге міндеттейді”, – дейді Айжан Құлбаева.
Ол жұмыста да, өмірде де туындайтын барлық жағдайларға төтеп беру үшін бос уақытында коммуникация, кәсіби даму туралы кітаптарды, сондай-ақ психологияға қатысты басылымдарды оқитынын айтады.
Айта кетейік, Бишімбаев сотынан кейін танымал болған судья Айжан Құлбаева өмірде де мінезінің қатал екенін айтады.