Супермаркеттерге кіру ережелері: Қазақстандықтар сөмке не пакеттерін шкафтарға қалдыруға міндетті емес

Фото: ЖИ

Қазақстандықтар сөмкелері мен пакеттерін супермаркет шкафтарында қалдыруға және сөмкенің ішін күзетшілерге көрсетуге міндетті емес. Сауда және интеграция министрлігі тұтынушылардың құқықтарын еске түсірді. Бұл туралы Stan.kz ақпарат агенттігі хабарлайды. 

Министрлік "Тұтынушылардың құқықтарын қорғау туралы" заңның 34-бабында азаматтардың тауарлар мен қызметтерге еркін және қауіпсіз қол жеткізу құқықтары бекітілгенін хабарлады.

"Тұтынушылар сауда аймағына жеке заттарымен – сөмкемен, рюкзакпен немесе пакетпен еркін кіре алады. Ешбір заң ережелері сөмкені шкафқа тастап кетуді талап етпейді. Егер күзетші мұны сұраса, сіз өз еркіңізбен келіскен жағдайда ғана олар заң шеңберінде әрекет етеді. Бұл Азаматтық кодекстің 39-тарауы "Сақтау шарты” бойынша реттеледі. Сондықтан ешкім өз заттарыңызды тастауға мәжбүрлей алмайды", – деді министрлік.

Күзетшілер сізден шыққан кезде сөмкеңіздің ішіндегісін көрсетуіңізді сұраса да, бас тартуға толық құқығыңыз бар.

"Әкімшілік құқықбұзушылық туралы кодекстің 16-бабында жеке басын тінту және заттарды тексеруге тек уәкілетті органдар, яғни полиция қызметкерлеріне рұқсат етіледі. Оған күзет кірмейді. Мұндай әрекеттер полиция қызметкерлерінің қатысуымен жүргізіліп, бейнетаспаға түсіріліп, хаттама толтырылуы тиіс. Тіпті сөреден зат алсаңыз да, күзетшілер полицияны шақырып, олардың келуін күтуі керек", – делінген хабарламада.

Күзетшілердің өкілеттігі "Күзет қызметі туралы" Заңмен қатаң реттеледі. 1, 3, 4-баптарына сәйкес күзетшілер қауіпсіздікті қамтамасыз етеді және мүлікті қорғайды, бірақ азаматтардың құқықтары мен бостандықтарын бұзуға жол берілмейді. Бұл олардың жеке тінтуге, қудалауға, заңды негізсіз күш қолдануға немесе қозғалыс еркіндігін шектеуге құқығы жоқ дегенді білдіреді. Күзетшілердің өкілеттіктерін асыра пайдалану Қылмыстық кодекстің 252-бабы "Жеке күзет ұйымы қызметкерлерінің өкілеттіктерін теріс пайдалануы" бойынша қылмыстық жауаптылыққа әкеп соғуы мүмкін.

"Егер сіздің құқықтарыңыз бұзылып жатса, заңсыз талаптардан сыпайы түрде бас тартып, полицияға қоңырау шалуды ұсыныңыз. Оқиғаны бейнекамераға немесе куәгерлердің көмегімен түсіріңіз, содан кейін супермаркет әкімшілігіне шағым түсіріңіз немесе жергілікті полиция бөліміне хабарласыңыз", – деп қосты сауда министрлігі.