Солтүстік Қазақстанда су тасқынының екінші толқыны басталды
Мамандар Солтүстік Қазақстанда су тасқынының екінші толқыны басталғанын және оның алғашқыға қарағанда әлдеқайда күшті болатынын айтты. Бұл туралы Stan.kz ақпарат агенттігі КТК арнасына сілтеме жасап хабарлайды.
Фото: Видеодан скрин
Мамандар тасқын су Петропавлға осы аптаның аяғында келеді деп болжам жасады.
“Қазір судың көтерілгені және екінші толқынның басталғанын байқауға болады. Себебі су Ақмола облысынан келіп қосылады. Сергеев су қоймасында су қайта көтерілген. Соңғы төрт сағатта су деңгейі 1 сантиметрге көтерілді. Петропавл маңында да 5-10 сәуір аралығында су қайта көтеріледі”, – деді "Қазгидромет" РМК СҚО филиалының директоры Қымбат Мерғалимова.
Гидрологтар Петропавлға нақты қанша көлемде су келетінін тек Ақмола облысындағы екінші толқыннан кейін айта алады. Әзірге су деңгейінің көтерілуі ғана тіркеліп жатыр. Заречный шағын ауданы мен Есіл өзенінің жайылмасында орналасқан 8 мыңға жуық саяжай, сондай-ақ республикалық тас жол қазір қауіпті аймақта. Мамандар екінші толқынның бірінші толқынмен түйісуі мүмкін екенін жоққа шығармайды. Ол әзірге қауіпті деңгейге жеткен жоқ, бірақ қиындықтар туғызды.
Бүгін айналма жолдың бір бөлігін су басты. Су тасқынының тереңдігі 10 сантиметрді, ал ені 20 метрге жетті.
Облыстық төтенше жағдай департаментінің жоспарлау және жедел басқару орталығының бастығы Владимир Хутинаев республикалық маңызы бар "Петропавл қаласын айналып өту" автожолының 27-шақырымы су астында қалғанын айтты. Қазір жол қозғалысы ашық. Егер бұл жол жабылған жағдайда жүргізушілер үшін балама айналма жол туралы ақпараттық тақталар дайындалған.
Бұған дейін Қазақстан мен Қырғызстан шекарасындағы өткізу пунктін су басқаны туралы жазған едік.