Соңғы жаңалықтар
Соңғы жаңалықтар

"Сыртқа апарып өлтіріп, далаға көміп тастар еді": Бишімбаевтың қорғаушысы қылмыс қасақана болмағанын дәлелдемек болды

Салтанат Нүкенованы азаптап өлтірді деп айыпталған Қуандық Бишімбаевтың қылмыстық ісі бойынша сот отырысында жарыссөз басталды. Сотталушының адвокаттары оның қасақана қылмыс жасағанын дәлелдемек. Бұл туралы Stan.kz ақпарат агенттігі хабарлайды.

Тікелей эфирден скриншот

Бишімбаевтың адвокаты Ерлан Ғазымжанов "қасақана" ұғымы соққылардың санымен немесе олардың салдарымен анықталмайды деп түсіндірді.

"Нүкенованың өлімінен Бишімбаевқа не пайда? Оған не керек? Айыптау актінде бұған бірде-бір жауап келтірілмеген. Өлтіргісі келді дейді, бірақ не үшін екенін прокурор түсіндірген жоқ. Бәрі  "нарцисс", "агрессор" деген сөздермен айыптап жатыр", – деді адвокат.

Сөзінше, қасақана өлтіргісі келсе, басқа әдісті қолданар еді.

"Елестетіп көрейікші, егер Бишімбаев кісі өлтіргісі келсе, оны өз қолымен істер ме еді? Киллер жалдап-ақ еш білдірместен Нүкенованы өлтіргізер еді”, – деді ол.

Айтуынша, киллер жалдау туралы бірде-бір дәлел жоқ. 

"Бишімбаев өз қолымен кісі өлтіргісі келді делік, онда қаруын алдын ала дайындап, Нүкенованы тыныш жерге апарып, өлтіріп тастайтын еді ғой?", – деп қосты Ғазымжанов.

Адвокат Бишімбаев концертте немесе одан кейін әйелін ұрып-соққанда оны өлтіргісі келді деген нұсқаны күлкілі деп атады.

"Олай болса, ол кісі өлімін созып, таң атқанша арақатынастарын шешіп отырмас еді. Одан да оны қаладан алып шығып, өлтіріп, далаға көміп тастамай ма?”, – дейді Ерлан Ғазымжанов.

Ғазымжановтың осы сөзінен кейін судья үзіліс жариялады.

Талқылау