Қазақстанда Jet, Yandex, Woosh, Bolt және EOM самокат компанияларына ультиматум қойылды

Фото: Рolisia.kz

Ішкі істер министрлігі Қазақстан жолдарындағы қауіпсіздік шараларын күшейтіп, полиция электрсамокаттарды өз бақылауына алады. Бұл туралы Stan.kz ақпарат агенттігі Рolisia.kz порталына сілтеме жасап хабарлайды.

Ішкі істер министрлігінде кикшерингілік яғни, қала ішінде қысқа қашықтыққа жалға берілетін электрсамокаттарды пайдалану жүйесі бойынша компаниялардың иелерімен кеңес өтті. Жиын барысында жол-көлік оқиғаларының көбеюі, құқықтық реттеудің жеткіліксіздігі және осы саладағы тәртіпті орнатуға бағытталған шаралар талқыланды.

Кеңес қорытындысына сәйкес, кикшерингілік компанияларға (Jet, Яндекс, Woosh, Bolt және Біріңғай микромобильділік операторы) бірқатар талап қойылды. 

1. Полиция қызметкерлерінің қатысуымен мобильді патрульдік топтар құру;
2. Электрсамокатты пайдаланушылар тарапынан болатын құқық бұзушылықтардың алдын алу;
3. Ретсіз қалдырылған самокаттарға тосқауыл қою.

Сонымен қатар компанияларға:

• Электрсамокатты арнайы тұрақ орындарына қоймайынша сапарды (төлемді) аяқтауға мүмкіндік бермеу;
• Жаяу жүргіншілер аймақтарында, саябақтарда, жағалауда және бұқаралық іс-шаралар өтетін жерлерде самокаттардың жұмысын автоматты түрде бұғаттау тапсырылды.

Ішкі істер министрлігінің мәліметінше, биыл елімізде электрсамокаттардың қатысуымен 213 жол-көлік оқиғасы тіркеліп, 224 адам зардап шекті. Самокатшылардың кінәсінен 42 апат болып, 52 адам жарақат алған. Барлық оқиғаның 95%-ы дәл Алматыда болған.

“Жол қозғалысы туралы заңға енгізілген өзгерістерге екі жыл болса да, айтарлықтай ілгерілеуді көріп отырған жоқпыз. Бұзушылықтар күн сайын тіркелуде, ал кикшерингілік компаниялардың қауіпсіздік бағытындағы жұмысы әлі де күткен нәтижеге жетпей отыр. Территориялық полиция департаменттеріне ретсіз қойылған самокаттарды арнайы тұрақтарға жеткізуді тапсырдым”, – деді Қайрат Сұлтанбаев.

Жыл басынан бері электрсамокат жүргізушілері 20 мыңнан астам жол ережесін бұзған. Оның ішінде:

• 6 жағдай – мас күйінде басқару;

• 10 мыңға жуық айыппұл – жол қозғалысы ережелерін бұзғаны үшін;

• Ондаған жағдай – ата-аналардың балаларға самокатпен жолға шығуға рұқсат беруі.

Бұзушылықтардың басым бөлігі, яғни 76%-ы Алматыда болған. Шаһарда 7 435 жағдай тіркелді.