Салық пен айыппұл көлемі артады: Қазақстанда 2026 жылға арналған жаңартылған АЕК мөлшері аталды

Қаржы министрлігі 2026–2028 жылдарға арналған республикалық бюджет жобасын жариялады. Құжат министрлер кабинетінде мақұлданып, Парламентке жолданды. Онда негізгі әлеуметтік көрсеткіштер – зейнетақы, ең төменгі күнкөріс деңгейі және АЕК көрсетілген. Бұл туралы Stan.kz ақпарат агенттігі хабарлайды.

Құжатқа сәйкес келер жылы негізгі қаржылық көрсеткіштер келесідей болады:

– АЕК (айлық есептік көрсеткіш) – 4 325 теңге (2025 жылы – 3 932 теңге).

– Ең төменгі зейнетақы – 69 049 теңге (2025 жылы – 62 771 теңге).

– Базалық зейнетақы төлемі – 35 596 теңге (2025 жылы – 32 360 теңге).

– Әлеуметтік төлемдерге арналған ең төменгі күнкөріс деңгейі – 50 851 теңге (2025 жылы – 46 228 теңге).

АЕК-тің өсуі айыппұлдар, мемлекеттік баждар мен салықтардың мөлшеріне тікелей әсер етеді. Сонымен қатар әлеуметтік төлемдер де осы көрсеткіштерге байланысты көбейеді.

Қазір бюджет жобасы талқылау сатысында: оны 26 тамызда Үкімет мақұлдап, Парламентке жіберді. Алдағы уақытта Мәжіліс пен Сенат депутаттары қарап, түзетулер енгізуі мүмкін. Дегенмен негізгі әлеуметтік параметрлер, әдетте, өзгеріссіз қалады. Бюджет туралы заң жыл соңына дейін қабылданып, Президент қол қоюы тиіс. Ол 2026 жылғы 1 қаңтардан бастап күшіне енеді.

Үкімет болжамы бойынша, 2026 жылы зейнетақы мен жәрдемақы алушылардың саны шамамен 300 мың адамға артады. Студенттердің стипендиясы көтеріледі, ал мемлекеттік білім гранттарының саны 19 мыңға көбейеді. Сондай-ақ мемлекет міндетті әлеуметтік медициналық сақтандыру жүйесін қаржыландыруды жалғастырады.

Еске салайық, бұған дейін келесі жылы ең төменгі жалақы мөлшері өзгеріссіз қалатыны туралы жазған едік.