"Реанимобиль емес, мүгедек арба ұсынылған": 5 жасар қыздың өліміне қатысты Алматы әуежайының үстіне сотқа арыз түсті
Алматы әуежайына Инсаф есімді 5 жасар қыздың өліміне байланысты сотқа талап қойылды. Отбасының адвокаты Дәнілхан Шағатаевтың айтуынша, ауыр халде болған бүлдіршін әуежайда паспорттық бақылаудан жалпы тәртіп бойынша өтуге мәжбүр болған. Ал оған қажетті жедел жәрдем көлігі емес, мүгедектерге арналған арба ұсынылған. Инсаф ақпан айының басында қайтыс болды. Бұл туралы Stan.kz ақпарат агенттігі хабарлайды.
Фото: Stan.kz
Оқиға 2025 жылдың қаңтар айында болған. Инсаф ата-анасымен және реаниматолог дәрігермен бірге Нью-Делиден Алматыға Air Astana рейсімен ұшып келген. Ұшу барысында қыз бала оттегімен, жатқызып тасымалданған.
Оның ауыр жағдайына қарамастан, Алматы әуежайына қонған соң, реанимобиль емес, мүгедек арба ұсынылған. Адвокаттың айтуынша, бұл арба қыздың жағдайына мүлде сәйкес болмаған.
Жеке жалданған реанимобиль әуежай аумағына кіре алмай, оған рұқсат берілмеген. Әуежайға тиесілі жедел жәрдем көлігі де ұсынылмаған.
Осылайша, Инсафты амбулифт арқылы ұшақтан терминалға жеткізген. Алайда амбулифт мүгедек жолаушыларды ұшаққа отырғызуға арналған құрылғы болғанымен, ауыр халдегі баланы тасымалдауға бейімделмеген.
"Бала арнайы медициналық бақылау арқылы емес, әдеттегі жолаушылар секілді паспорттық тексерістен өтуге мәжбүр болды. Бұл – ұшу алдындағы Алматыдан шығуда болған жағдайға мүлдем қарама-қайшы", – деп жазды Шағатаев.
Сол күннен кейін Инсаф қос өкпесінен пневмоторакс алып, жансақтау бөліміне түсті. Ол 9 ақпанда көз жұмды.
Түрксіб аудандық соты отбасының Алматы әуежайына қарсы талап арызын қабылдап, азаматтық істі қарауға дайындауды бастады.
Air Astana компаниясы өз кезегінде Алматы әуежайының қызметтерін алдын ала ескерткені туралы мәлімдеді. Алайда әуежай қызметкерлері не себепті мүгедек арба әкелгендерін түсіндірмеген. Реанимобильдің кіруіне рұқсат берілмегені "қызметтермен келісілмеген" деген себеппен түсіндірілген.
Сонымен бірге әуежай өкілдері жедел жәрдем көлігін шақыруды ұсынғандарын, алайда баланың ата-анасы бұл ұсыныстан бас тартқанын мәлімдеген.
Қайғылы оқиға қоғамда үлкен резонанс тудырды. Көпшілік әуежай қызметкерлерінің бейқамдығына наразылық білдіріп, мұндай жағдайдың қайталанбауын талап етті.
Еске салайық, бұған дейін Алматы халықаралық әуежайы мен қазақстандық Fly Arystan лоукостеріне қатысты тергеу жүргізіліп жатқанын жазған едік. Кәсіпкерлерден Алматы халықаралық әуежайы тарапынан бәсекелестікті шектеуге байланысты шағымдар түсті. Әуежай аумағында қызмет көрсетуші компанияларды таңдау кезінде заңбұзушылық белгілері анықталып, агенттік тиісті ескерту жасаға