Пышақпен қорқытып, күш көрсеткен: Түркістан облысында екі жігіт ер адамнан бес миллион теңге бопсалаған

Түркістан облысында ер адам белгісіз қаскөйлер оны пышақпен қорқытып, күш көрсетіп, 5 млн теңге бопсалағанын айтты деп хабарлайды Stan.kz ақпарат агенттігі.

Оқиға Ленгер қаласында болған.

Түркістан облысының полиция департаменті бопсалаған күдікті жастарды анықтады. Ұстауға тергеу-жедел тобы және облыс ПД ПБББ тәжірибелі қызметкерлері қатысты.

Бес млн теңге алу кезінде полицейлер екі жігітті ұстады. Олар Төлеби ауданының тұрғындары болып шықты, біреуі бұрын сотталған екен.

Күдіктілердің бірінің үйінен полицейлер алты оқ тапты. Сараптама тағайындалды. Сотқа дейінгі тергеу жүргізілуде.