Пиротехникалық заттар мен от жағуға тыйым салу: Алматыда ерекше экологиялық талаптар енгізіледі

Алматыда атмосфералық ауаны қорғау саласында арнайы экологиялық талаптар енгізу жоспарланып жатыр. Қалалық экология және қоршаған ортаны қорғау басқармасы әзірлеген тиісті бұйрық жобасы Ашық НҚА порталында жарияланды. Бұл туралы Stan.kz ақпарат агенттігі хабарлайды.

Жаңа ережелер қаланың тау етегінде орналасуының географиялық ерекшеліктерін, атмосфералық ауаның жер қабатында қауіпті концентрацияларда ластаушы заттардың жиналуына ықпал ететін климаттық және басқа да табиғи жағдайларды ескере отырып әзірленді.

Құжатта не көрсетілген:

• Экологиялық кеңес пен "Таза қала" электронды платформасын құру. Ол экологиялық мониторинг және арнайы экологиялық талаптардың сақталуын бақылау үшін пайдаланылады.
• Білім беру ұйымдарына ауа тазартқыштар орнату, мобильді сенсорлар арқылы үй ішіндегі ауаның сапасын бақылау қажет болады. Сондай-ақ орта, техникалық және кәсіптік, орта білімнен кейінгі білім беру және қосымша білім беру ұйымдарында үшінші дәрежелі қолайсыз метеорологиялық жағдайларда сырттай сабақтар жүргізілмейді.
• Кейбір көліктерді кәдеге жарату үшін сатып алуға болады. Жұмыс істеп тұрған және сатып алу пункттеріне өз күшімен келген көліктер сатып алуға жатады.
• ІІІ санаттағы объектілерде (кәуапхана, моншалар, құрылыс алаңдары) шығарындыларды тазарту жүйесі орнатылады және тұрақты түрде ластануды өлшеу жүргізіледі.

Бұл ретте барлық инертті материалдарды – топырақты, қоқыстарды, сусымалы құрылыс материалдарын, жеңіл контейнерлерді, жапырақтарды, ағаш кесілген жерлерді брезентпен немесе жолдың ластануын болдырмайтын басқа материалмен жабылмай, шаңды басатын жүйелерді қолданбай тасымалдауға тыйым салынады.

"Сонымен қатар қала аумағында ашық немесе жабық түрде кез келген қондырғыларда, контейнерлерде, урналарда от жағуға және шөптерді, жапырақтарды, қатты тұрмыстық қалдықтарды, өндірістік қалдықтарды, дөңгелектерді, пластмасса және полиэтилен қалдықтарын, оның ішінде қауіпті қалдықтарды жағуға тыйым салынады", – делінген құжатта.

Сонымен қатар Алматы азаматтық пиротехникалық заттар мен олар қолданылған бұйымдарды шығаруға тыйым салғысы келеді.

Ережеде ақылы кіруі бар экологиялық аймақ құру да қарастырылған. Әрбір күнтізбелік күн үшін бейнекамера деректері бойынша аймақта көлік құралын пайдалану үшін ақы алынады.

Алынған қаражат экологиялық бағдарламаларды әзірлеуге, қоғамдық көлікті дамытуға және арнайы аймақты басқаруға жұмсалады. Бұйрық жобасы 20 тамызға дейін талқыланады.