Перизат Қайрат пен оның анасына қатысты істің мән-жайы белгілі болды
Перизат Қайрат пен Ғайни Алашбаева әрекеттері сарапталып, олар алаяқтықты аса ірі көлемде жасағаны және қылмыстық жолмен алынған қаражатты заңдастырғаны үшін күдікті деп танылды. Бұл туралы Stan.kz ақпарат агенттігі хабарлайды.
Фото: Перизат Қайрат пен Ғайна Алашбаеваның желідегі парақшасынан
Перизат Қайрат 2021-2024 жылдар аралығында қайырымдылық көмек көрсету мақсатында халықтан ақша жинаған. Оның айтуынша, бұл қаражаттар мұқтаж балаларға, Палестина және су тасқынынан зардап шеккендерге көмек көрсету үшін жұмсалмақ болған.
Тергеу амалдарының нәтижесіне сай, жалпы ұрланған қаржы көлемі 3,5 миллиард теңге болды. Перизат Қайрат "Biz Birgemiz Qazaqstan 2030" қорына түскен қаражатты өзі жеке және анасы Ғайни Алашбаеваның есепшоттарына аударып, кейін оларды зергерлік бұйымдарға, киім-кешекке, жиһаз бен саяхаттарға, жөндеу қызметтеріне, автокөлік жалдау және басқа да шығындарға жұмсаған.
Айта кетейік, 2024 жылы 1 сәуір мен 15 қараша аралығында Перизат Қайрат су тасқынынан зардап шеккендерге көмек көрсету мақсатында "Biz Birgemiz Qazaqstan 2030" қорының есепшотына 2,8 миллиард теңге жиналып жымқырылғаны анықталды.
Қылмыстық табысты жымқыру мақсатында ол 16 серіктес жеке кәсіпкерлермен металдан жасалған киіз үйлер, қайықтар, етіктер және басқа да заттарды жеткізу жөнінде жалған келісімдер жасасқан. Алайда бұл келісімдер іс жүзінде орындалмаған.
Осылайша миллиард теңгеден астам қаражат қолма-қол ақшаға айналдырылып, жеке мақсаттарына жұмсалған. Бұл соманың 72 миллион теңгесі оның анасы Ғайни Алашбаеваның есепшотына "Солтүстік Қазақстан облысындағы зардап шеккен тұрғындарға тұрмыстық техника сатып алу" деген сылтаумен аударылып, кейін ол Перизат Қайрат арқылы қолма-қол ақшаға айналды.
Ақшаның бір бөлігі сомасы 6,9 миллион теңге құраған "Rolex" сағатын сатып алуға жұмсалған. Палестинаға көмек көрсету үшін жиналған қаражаттың бір бөлігі 2024 жылдың қаңтарында Перизат Қайрат "Rebel flowers" ЖШС сатып алуға жұмсалған. Оның құны 23 миллион теңге болса да, ол келісімшартта күдік туғызбау үшін 2 миллион теңгеге төмендетілген соманы көрсеткен. Гүл бизнесінен түскен табысы 69 миллион теңге болды.
Тергеу деректеріне сай, ұрланған қаражатқа 4 автокөлік, 4 пәтер, 2 автотұрақ орнын, үй, жер телімін және ғимарат сатып алынған. Сонымен қатар жалпы құны 158 миллион теңге болатын зергерлік бұйымдар, аяқкиім және сөмкелер тәркіленді.
Жалпы құны 865 миллион теңге болатын қылмыстық жолмен алынған мүлікке тыйым салынды. Ғайни Алашбаеваға қатысты үйқамақ түріндегі бұлтартпау шарасы қабылданды.
Еске салайық, бұған дейін Қаржы мониторингі агенттігі “Biz Birgemiz” қорының басшысы Перизат Қайратқа қатысты тергеудің аяқталғанын растады. Қазір тараптар іс материалымен танысып жатқанын айтқан еді. ҚМА төрағасының орынбасары Жеңіс Елемесов іс бойынша шығын көлемі 3,5 миллиард теңге деп анықталған. Астана соты әділет департаментінің "Biz Birgemiz Qazaqstan 2030" қоғамдық бірлестігін таратқан еді.