Павлодарда ішімдікке салынғандардың үйінде тұрған үш бүлдіршін балалар үйіне орналастырылды
Павлодарда адам төзгісіз жағдайда өмір сүрген үш бүлдіршін балалар үйіне орналастырылды. Бұл туралы Stan.kz ақпарат агенттігі 31-арнаның Информбюро жаңалықтар бағдарламасына сілтеме жасап хабарлайды.
Видеодан скриншот
Полицейлер қаладағы пәтерлердің бірінен ішімдікке салынған ата-ананың балаларына мүлдем қарамағанын анықтады. Лас үйдің ішінде азық-түлік мүлдем болмаған, ал тоңазытқыштың іші арақ-шарапқа толып тұрған. Астан-кестеңі шыққан пәтерде 2 және 4 жастағы балалардың ұйықтайтын төсектері де болмаған. 21 мен 22 жастағы ерлі-зайыптының ісі енді сотта қаралады.
Павлодар облысы бойынша ішкі істер органдарының есебінде осындай 288 отбасы тұр.
“Кәмелетке толмаған балаларды тәрбиелеу жөніндегі міндеттерді тиісінше орындамағаны үшін 22 және 21 жастағы ата-анаға қатысты ӘҚБК 127-бабының 1-бөлігі бойынша әкімшілік материал толтырылып, сотқа жіберілді. Жас отбасының әрекеті кәмелетке толмағандардың істері және олардың құқықтарын қорғау жөніндегі қалалық комиссияда қаралады”, – деді Павлодар қалалық полиция бөлімінің аға инспекторы Руслан Сүлейменов.