Павлодар тұрғыны бір ай 42500 теңгеге өмір сүріп, тәжірибе жасады
42500 теңгеге бір ай өмір сүріп, тәжірибе жасаған павлодарлық Марат Сәбитов қалай ашыққаны туралы айтып берді, деп хабарлайды Stan.kz ақпарат агенттігі.
Отбасылы ер адам төменгі жалақыға өмір сүруге тырысып көрген. "42 500-де Live" тәжірибесін жасаған ол, балаларыңыз болса, бұл ақшаның мүлдем жетпейтінін айтты. Ол тамақтануға үнемдегенімен, балабақша мен мектеп шығындарына ақшаны жеткізу мүмкін емес дейді.
"Эксперименттің 20-шы күні мен балабақшадан шамамен 12 мың теңге көлемінде түбіртек алдым. Оны төлеуге мүмкіндігім жоқ. Бұл менің жұбайымды және үш баламды не себепті экспериментке қоспайтынымды сұрайтындарға жауап. Отбасын минималды жалақы бойынша асырау мүмкін емес, 42 500 сіздің балаңыздың барын есептемейді", - дейді Сәбитов.
Ер адам 24 қыркүйектен бастап тәжірибе жүргізген. Күн сайын ол тамақ сатып алу, салмағының өзгеруі туралы ақпараттармен бөлісіп отырған. Бастапқыда отбасы Маратты түсінбей, қылығын күлкіге айналдырған. Алайда қазір барлығы бұл тәжірибенің нәтижесін күтуде.
"Алғашқы күндері қатты тітіркену болды. Қазір ағзам үйреніп қалған, қатты аштық сезімі жоқ. Үнемі барлығын үнемдеп, аз мөлшерде тамақтанып, ақшаңызды жоспарлауыңыз керек. Кейбір күндері отбасымнан көкөніс ұрлауға тура келді", - дейді ол.
Марат 42 500-нің он мыңнан астам теңгесін коммуналдық қызметтер мен бензинге жұмсады. Мараттың сөзінше жеке көлігіңіз болмаса, бұл қаражатты жеткізу қиын.
Ер адам әдеттегі дүкендерден тамақ сатып алады. Мәзір күн сайын қол жетімді өнімдер негізінде жоспарланады.
"Тәжірибе басталғанға дейін мен екі келі ет сатып алдым, оны пісіріп, кішкене бөліктерге бөліп, күніне бір-екіден көкөністермен, жармалармен жедім. Қазір менің тамақ рационым жарма мен көкөністерден тұрады. Мен тауық бауырын да таптым, ол етті алмастырады", - дейді Марат.
Марат әр тағамды шөптермен, мейіздермен безендіріп, табаққа әдемі орналастыруға тырысады, бұл депрессиядан құтқарады және көңіл-күйді көтереді екен.
"Егер оң жақтары туралы айтатын болсақ, мен темекі шегуден бас тартуым керек еді, сол арқылы жеті мың теңгені үнемдедім. Қаражатым шектеулі болғандықтан, мен тек пайдалы тағамдарды таңдауға тырысамын, шамадан тыс тамақтану мүмкін емес. Мен бес келі салмақ тастадым, қантым қалыпқа келді", - дейді Сәбитов.
Ер адамның айтуынша, енді оның 3 877 теңгесі қалды, оны айдың соңына дейін жеткізуге тура келеді.
"Егер сіз тек қана арпаға ауысып, өмір сүрсеңіз, сіз 42 500 теңгемен күн көре аласыз. Бірақ бұл өмір емес, тірі қалу. Менің тамақ ішу тәсілім физикалық еңбекке арналмаған. Алайда мен экспериментті күзде бастағандықтан, көкөністер мен сүт өнімдері қазір арзан. Сонымен қатар, Павлодардағы бағалар Нұр-Сұлтан, Алматы, Ақтау қалаларынан сәл төмен. 42 500-ге өмір сүру мүмкін емес", - дейді ол.
Ер адам Қазақстандағы ең төменгі жалақы мөлшерін қайта қарау керек деп санайды.
"Бұл ақша тек тамақтануға, максималды әлеуметтік қызметтерге жетеді. Бірақ сізге киім, дәрі-дәрмек қажет. Егер адамға ай сайын осындай жалақы төленсе, менің ойымша, оған кез келген адам шыдамайды. Ал қыста бұл әдетте тіпті қиын", - деп қорытындылады павлодар тұрғыны.