Париж-2024: Айдос Сұлтанғали алғашқы айналымда екі дүркін әлем чемпионымен белдеседі
Бүгін грек-рим күресінен жарыс алаңына шығатын Айдос Сұлтанғали алғашқы белдесуінде-ақ екі дүркін әлем чемпионымен кездеседі. Бұл туралы Stan.kz ақпарат агенттігі хабарлайды.
Фото: ҰОК
Грек-рим күресінен сынға түсетін балуандардың жеребесі тартылды. Жарыстың алғашқы күнінде бозкілемге шығатын 60 және 130 келідегі балуандардың қарсыластары анықталды. 60 келіде ел намысын қорғайтын Айдос Сұлтанғали алғашқы белдесуінде-ақ осы дүрмектің басты фавориті саналатын, екі дүркін әлем чемпионы қырғызстандық Жоламан Шаршенбековпен күреседі. Сондай-ақ бұл топта жапондық Кеничиро Фумита мен ирандық Нежат Мохсен де бар.
130 келіде сынға түсетін Әлімхан Сыздықов та мықты топқа түскен. Ол алғашқы айналымда румыниялық Алин Алексукқа қарсы белдеседі. Сондай-ақ Әлімханның тобында төрт дүркін олимпиада чемпионы, кубалық Михаин Лопес бар. Екеуінің жолы жартылай финалда түйісуі мүмкін.
Айта кетейік, Қазақстан грек-рим күресінен соңғы рет Бейжің олимпиадасында жүлде алған еді. Одан кейін қазақстандық балуандар жеңіс тұғырынан көрінген жоқ.
