Алматы полициясы қызметкерлерінің мәліметінше, жас жігіттің құрбандары оның туыстары мен таныстары болған. Кепілдегі жылжымалы және жылжымайтын мүлік бойынша банктік сауда-саттыққа қатысу сылтауымен күдікті олардан көп мөлшерде сома алып, бірақ өз уәделерін орындамаған.

"Күдіктінің банктермен ешқандай байланысы болмаған, бірақ кепілге қойылған мүлік аукционының жүйесін үстіртін білген. Ол өз құрбандарын тұрғын үй немесе автокөлік нарықтық бағадан әлдеқайда төмен бағамен сатып алуға болады деп сендірген. Әрине, бұл үшін ақшалай қаражат қажет болды", - деді Алматы криминалдық полиция басқармасының бастығы Еркін Іңкәров.

Оның айтуынша, жас жігіттің кейбір құрбандары бірден бірнеше мүлік сатып алуға үміттеніп, оған қомақты қаражат берген. Мәселен, жәбірленушілердің бірінен 182 миллион теңге шығын көрген. Тағы біреуі жігітке 386000 доллар берген. Залалдың жалпы сомасы бүгінгі күні шамамен бір миллион долларды құрайды.

"Әрине, ол қандай-да бір міндеттемелерді орындауды қаламады. Ол ақшаны оңай жұмсады: өзіне екі пәтер, жаңа көлік сатып алды, шетелге ұшып кетті, жалпы, жақсы өмір сүрді. Бірақ ол ұзаққа созылмады", - деді Іңкәров.

Қазіргі уақытта күдікті ұсталып, Алматы ПД уақытша ұстау изоляторына қамалды. Сотқа дейінгі тергеу ҚР ҚК-нің 190-бабының 4-бөлігі - "ірі мөлшерде жасалған алаяқтық" бойынша жүргізілуде. Егер жас жігіттің кінәсі дәлелденсе, оның мүлкі тәркілеп, он жылға дейін бас бостандығынан айырылуы мүмкін.

Күдіктінің қылмыстық әрекеттерінен зардап шеккен азаматтарды полиция 8-701-666-69-54, 8-707-834-83-33 немесе 102 телефон нөмірлеріне хабарласуын сұрайды.

Талқылау