"Өте сасық, темекі иісі сіңіп кеткен": Египетке саяхаттап барған қазақстандық туристерді "4 жұлдызды" қонақүйдің жағдайы ашуландырды

08.05.25 / 16:31

Фото: Видеодан скрин

12 адамнан тұратын қазақстандық туристер тобы Египетке Fun Sun туроператорының "Fortuna 4" жүйесімен тур сатып алып барған. Бірақ оларға уәде етілген төрт жұлдызды қонақүйдің орнына антисанитарлық жағдайдағы, стандартқа сай келмейтін, тіпті үш жұлдызға да татымайтын қонақүй берілген. Бұл туралы Stan.kz ақпарат агенттігі жағдайдың егжей-тегжейін білу үшін туроператордың өзінен сұрап білді.

Турист Эльмира Нагаева бөлмелер лас, темекі сасық, тіпті қоқыс арасында контрацептивтер табылғанын айтып берді. Туристер алғаш ұсынылған бөлмеден бас тартып, ақыры екі отбасыны бір бөлмеге орналастыруға мәжбүр болған.

"Fun Sun туроператорына сеніп, Египетке "Fortuna 4 жұлдыз" деп аталатын жанып тұрған турмен 5 ересек және 7 бала бардық. Бізді ешқандай стандартқа сай келмейтін, үш жұлдыздың иісі де жоқ, төрт жұлдыз туралы айтудың өзі артық бір қонақүйге орналастырды. Толық антисанитария, лас бөлмелер, өте нашар жағдай. Бастапқыда ұсынылған бөлмеден бірден бас тарттық, себебі ол өте сасық, темекі иісі сіңіп кеткен, тіпті ішіндегі қоқыстың арасында контрацептивтердің пакеттері шашылып жатқан. Ақыры, үшінші әрекеттен кейін, екі отбасын бір бөлмеге орналастырды, ал ол үшін олар 986 мың теңге төлеген еді", – деді Эльмира Нагаева.

Эльмира Нагаеваның сөзінше, олар қонақүйдің мейрамханасында тамақ іше алмай, қосымша ақша шығындап, сырттан тамақ алуға мәжбүр болған. Ал бұл қызметтердің бәрі алдын ала төлеп қойған пакетке кіреді дейді турист.

"Бұл қонақүйге Қазақстан мен Өзбекстаннан келген туристерді ғана орналастырып жатыр. Ол төрт жұлдызға мүлде сай емес, бұл – таза алдау. Fun Sun бізді басқа қонақүйге көшіруден бас тартып отыр. Олар басқа қонақүйлерде орын жоқ, барлығы бос емес дейді. Бірақ, қызығы сол, қосымша ақша төлесең, бірден орын табыла кетеді", – деп жазды Эльмира Нагаева.

Әйел өздері орналасқан мейрамхананы көрсетіп, мұнда толығымен антисанитарлық жағдай жоқ екенін айтып берді.

"Мұнда тамақ ішу мүмкін емес. Егер туристерге осындай көрініс ұсынылса, асүйде не болып жатқанын елестетудің өзі қорқынышты. Суды осы жерден аламыз, ал шай мен ерігіш кофені пакетпен береміз. Ыдыстарды жуса да, оларды шаймайды. Стақандар кір екенін көруге болады", – деп ашуланды турист.

Бұл мәселеге қатысты Fun Sun туроператоры жауап беріп, агенттерімен қалай жұмыс жүргізілетінін айтып берді.

"Желіде пайда болған ролик "Fortuna 3-4-5" жүйесі бойынша сатып алынған турға қатысты. Айта кетейік, бұл жүйе қонақүйдің атауы алдын ала белгілі болмайтын, бірақ жұлдыз деңгейі кепілдендірілген және ең тартымды бағамен ұсынылатын турларды брондауды қарастырады. Бұл шарттар турды рәсімдеу кезінде туристке агенттік менеджері тарапынан міндетті түрде айтылуға тиіс. Өз өнімдеріміз бойынша толық әрі өзекті ақпаратпен қамтамасыз етілуі үшін агенттерге үнемі оқыту өткізіп тұрамыз. Клиентті дұрыс әрі толық ақпаратпен қамтамасыз ету жауапкершілігі турды рәсімдеген агенттікке жүктеледі", – деп жауап берді Fun Sun туроператоры.

Fun Sun туроператоры белгілі бір турларға қатысты барлық сұрақ бойынша тікелей турагенттікке жүгінуді ұсынады. Себебі барлық егжей-тегжей мен өзара әрекет сол турды сатқан менеджер арқылы жүзеге асады деді компания.

Келесі күні туристердің наразылығынан кейін оларды басқа қонақүйге көшірген.

"Төрт жұлдызбен еш қатысы жоқ сұмдық қонақүйден кейін бізді ақыры таза, қарапайым әрі жайлы қонақүйге ауыстырды. Біз өте ризамыз! Иә, біз Fortuna жүйесі бойынша 4 жұлдызды турды таңдадық, антисанитарияны емес. Бізге сай емес қонақүйді сатқанымыз үшін кінәлі емеспіз және үнсіз қалмадық. Мысалы, сіз Астана-Алматы бағытындағы ұшаққа 5 мың теңгеге акциямен билет сатып аласыз. Бірақ кейін сізге "Кешіріңіз, ұшпайсыз, пойызбен барасыз. Сонша ақшаға не күттіңіз?" десе, бұл қалыпты ма? Жоқ. Бұл жағдайда да солай. Біз 4 жұлдыз үшін ақы төледік және оны алуға толық құқығымыз болды", – деп жазды Эльмира Нагаева.

Турист Эльмира Нагаева билет сатып алған турагенттің олармен соңына дейін күресіп, бірге болғанына ерекше алғысын жеткізді.