"Олимпиадада атақ-даңққа қарамай, кез-келген спортшы чемпион атануы мүмкін": Даңқты балуан Алмат Кебіспаев Айдос Сұлтанғалидің олимпиадада жеңіске жете алатынын айтты
Грек-рим күресінен әлем чемпионатының бес дүркін жүлдегері Алмат Кебіспаев Париж олимпиадасында өнер көрсететін Айдос Сұлтанғалидің жеребесіне қатысты арнайы Stan.kz ақпарат агенттігіне пікір білдірді.
Фото: ҰОК
Даңқты балуан Алмат Кебіспаев Париж олимпиадасының алғашқы айналымында екі дүркін әлем чемпионы, қырғызстандық Жоламан Шершенбековке қарсы күресетін Айдостың олимпиада ойындарында атой салатын толық мүмкіндігі бар екенін айтты.
“Дзюдошыларымыз олимпиада ойындарында тамаша өнер көрсетті. Солардың жетістігіне басқа балуандардың да жетуін тілейміз. Олимпиада атақ-даңққа қарамайды. Кез келген спортшының жеңіске жету мүмкіндігі бар. Сондықтан жеребеге аса мән берудің қажеті жоқ. Айдостың Жоламанды ата-даңқына қарамай жеңіуіне толық мүмкіндігі бар. Бәрі өз қолында. Қарсыласқа дұрыс татика қойып, белдесу барысын дұрыс бағамдай білсе, жеңіске жетеді деп ойлаймын” – деді Алмат Кебіспаев .
Айта кетейік, бұған дейін бүгін жарыс алаңына шығатын 60 келідег Айдос Сұлтанғали мен аса ауыр салмақтағы Әлімхан Сыздықовтың алғашқы айналымда кімге қарсы күресетінін жазған едік.
