Олигархтар Қазақстанға миллиард доллардан артық қаражат қайтарған: Бұл ақша қайда жұмсалған

Олжас Бектенов Заңсыз иемденілген активтерді мемлекетке қайтару жөніндегі комиссияның отырысын өткізді. Бұл туралы Stan.kz ақпарат агенттігі хабарлайды.

Фото: depositphotos.com

Бұған дейін қабылданған шешімдердің орындалу нәтижелері қаралып, Қайтарылған активтерді басқару компаниясының жұмысы туралы есеп тыңдалды.

"Шамамен 610 млрд теңгенің активтері, атап айтқанда, 506 млрд теңге көлемінде ақшалай қаражат, сондай-ақ құны 103 млрд теңгеден астам мүлік қайтарылды. Арнаулы мемлекеттік қордан білім беру, денсаулық сақтау, спорт, әлеуметтік қамсыздандыру салаларындағы 280 әлеуметтік нысанды жүзеге асыруға, сондай-ақ коммуналдық инфрақұрылымды жаңғыртуға қаражат бөлінді”, – делінген хабарламада.

• "Екеуі ғана қайтарды, қалғаны қайда": Ермұрат Бәпи олигархтардың қайтарылған активтерін сұрады 

• "АҚШ, Ресей, Грузияда активтерін сақтайды": Қазақстандық шенеуніктердің шетелде мыңнан астам жылжымайтын мүлкі бары анықталды

Кезекті отырыс қорытындысы бойынша Комиссия заңсыз иемденілген активтерді мемлекетке ерікті түрде қайтару туралы бірқатар келісім жасауды мақұлдады.

"Арнаулы мемлекеттік қорға қосымша 150 млрд теңге бағытталады. Сонымен қатар "Заңсыз иемденілген активтерді мемлекетке қайтару туралы" Заң субъектілері Қазақстан экономикасына 10,5 млрд доллар инвестиция салу бойынша міндеттеме алды”, – делінген ақпаратта.

Сонымен қатар Комиссия "Заңсыз иемденілген активтерді мемлекетке қайтару туралы" ҚР Заңының күші қолданылатын тұлғаларға қатысты жалпы сомасы 84 млрд теңгеден астам активтерді мемлекет кірісіне айналдыру туралы сотқа талап-арыз беруді қолдады.

Еске салсақ, осыған дейін қайтарылған активтерді басқару компаниясы аукционда Алматыдағы бизнес орталықты 6,3 млрд теңгеге сатқан еді.