Жоғарғы сот үш жылға жуық уақыттан кейін сарбаздың кінәлі емес екенін анықтады, әскери бөлімнің басшылығының немқұрайлылығы себеп болғаны белгілі болды.

2019 жылдың жазында Маңғыстау облысындағы Бекет ата оқу полигонында 99116 әскери бөлімі жаттығу өткізді. Олар оқу гранаталарын емес, жауынгерлік гранаталарды қолданды. Сарбаздарды шатыр шапанына бөлшектелген түрде орналастырған.

Қатардағы жауынгер Сергей Кошелев Ф-1 гранатасын алып жинады. Содан кейін ол чекті жұлып алып, гранатаны лақтырған кезде жарылыс болды. Қатардағы жауынгер ауыр жарақат алып, бір көзінің көру қабілетінен және қолынан айырылды. Жарылыстың кесірінен әскери бөлімге алты млн теңгеге залал келді.

2020 жылдың сәуір айында Ақтөбе гарнизонының әскери соты бұл іс бойынша үкім шығарды. Артиллериялық қару-жарақ қызметінің бастығы капитан Хасен “Абдушахимовты айналасындағыларға қауіп төндіретін қару-жарақ пен заттармен жұмыс істеу қағидаларын бұзғаны үшін (ҚР ҚК 462-бабының 1-бөлігі) 505 мың теңге айыппұл салуға үкім шықты. Дәл осы баппен зәбір көрген Сергей Кошелев те кінәлі деп танылды. Бірақ ол қылмыстық жауапкершіліктен бірінші рет қылмыс жасағаны үшін және қоғамға қауіпті емес болғаны үшін босатылды. Сергей Кошелев кінәсін мойындамады.

Бас прокуратура іске араласып, айыптау үкіміне наразылық білдірді, іс Жоғарғы сотқа жетті. Жоғарғы Соттың сот алқасы оқу-әдістемелік сабақтарда жауынгерлік гранаталарды мүлдем қолдануға болмайтынын анықтады. Сондай-ақ, сабақтарда қауіпсіздік шараларымен танысу туралы қағазға басқа біреудің қол қойғанын анықтады.Мұны сот-қолжазба сараптамасы растады. Шын мәнінде, сарбаз қауіпсіздік шаралары туралы білмеді, полигондағы ережелерімен таныстырылмады әрі ол гранаталардың жауынгерлік екенін білмеді. Бұл жағдайда ол оның салдарын болжай алмайтын еді. Сот алқасы сабақтарда жауынгерлік гранатаның жарылуына командирлер мен офицерлердің жауапсыздығы себеп болды деген қорытындыға келді.

"Әскери бөлімнің басшылығы оқ-дәрілерді күзетуді бақылау мен тәртіпті тиісті деңгейде қамтамасыз етпеді, оқытылмаған әскери қызметшілерге немқұрайлы қарауға және жауынгерлік гранаталарды заңсызқолдануға жол берді, нәтижесінде ауыр зардаптар туындады", – делінген Жоғарғы сот алқасының қаулысында.

Осылайша, Жоғарғы сот Ақтөбе гарнизоны әскери сотының айыптау үкімін жойып, Сергей Кошелевтің іс-әрекетінде қылмыс құрамының болмауына байланысты қылмыстық істі тоқтатты.

Кошелевтың кінәсіздігі дәлелдену үшін үш жылдан астам уақыт қажет болды. Сот алқасы оған зиянды қалпына келтіру және өтеу құқығын қалдырды. Мұндай фактілер бойынша моральдық залал ел бюджетінен өндіріледі.

Талқылау