Нұр-Сұлтанда ата-аналар балаларын үйірмелерге жаздыру үшін оқушылар сарайына жаппай жиналды
Нұр-Сұлтан білім басқармасы оқушылар сарайының алдына топ болып жиналған ата-аналарға қатысты түсініктеме берді, деп хабарлайды Stan.kz ақпарат агенттігі.
Балаларды үйірмеге жаздыруға арналған сайт істен шыққан. Осыдан кейін ата-аналар Оқушылар сарайының алдында кезекке тұруға мәжбүр болыпты.
Ата-аналардың бірі сайт белгіленген уақытта жұмыс істемегенін айтады. Нәтижесінде адамдар таңертеңгі сегізден бастап балаларды үйірмеге дәстүрлі түрде жазу үшін мекеме жанында жиналған.
Білім басқармасы ата-аналар онлайн тіркелуге тиіс болғанын жеткізді.
"Интернет жоқ болғандықтан, үйірмелерге жазыла алмаған ата-аналар Оқушылар сарайына келді. Мұны ескере отыра, оқушылар сарайының қызметкерлері санитарлық талаптарды сақтай отыра келушілерді қабылдады. Компьютерлер қойылып, қызметкерлер ата-аналарға кеңес берді", – делінген білім басқармасының хабарламасында.
Бұған дейін әл-Фараби атындағы Оқушылар сарайы секцияларға жазылу 25 тамыздан басталатынын хабарлаған еді. Баланы үйірмеге MINDAL порталы арқылы онлайн жаздыру ұсынылды. Қандай да бір сұрақтар туындаса, Оқушылар сарайына келуге кеңес берді.