Нидерланды жоғарғы соты Қазақстанның пайдасына шешім шығарды
Нидерланды жоғарғы соты Қазақстанның пайдасына шешім шығарды. Анатолия мен Габриэль Стати ісі аясында "Самұрық-Қазына" ҰӘҚ" АҚ-ның KMG Kashagan B.V. акцияларына тыйым салу туралы шешім қайта қаралатын болы, деп хабарлайды Stan.kz ақпарат агенттігі.
Әділет министрлігінде хабарланғандай, 18 желтоқсанда Нидерланды жоғарғы соты Амстердам апелляциялық сотының 2019 жылғы 7 мамырдағы "Самұрық-Қазына" АҚ KMG Kashagan B.V.-нің акцияларын алып қоюға қатысты шешімінің күшін жойды.
Сот өз шешімін БҰҰ-ның мемлекеттердің юрисдикциялық иммунитеті және олардың меншігі туралы конвенциясының 19-бабына сүйене отырып, осы бапты халықаралық әдет деп танып, істі қарау үшін Гаага апелляциялық сотына жіберді. Нәтижесінде "Самұрық-Қазына" ҰӘҚ" АҚ акцияларын ҚМГ Қашаған Б.В. акцияларына тыйым салудың заңдылығын Гаага апелляциялық соты қайта қарайды.
"Қазақстан Республикасы Гаага апелляциялық соты шешімді заңсыз деп санайтынына сенімді", - делінген хабарламада.
Бұған дейін Бельгия соты Молдова кәсіпкерлері Анатол мен Габриэль Статидің алаяқтық әрекеттерінің жаңа дәлелдерін қарастыратыны хабарланған болатын.
"Бельгиядағы Брюссельдің апелляциялық соты Қазақстанға Молдова азаматтары Анатол мен Габриэль Стати және олардың Ascom Group SA және Terra Raf Trans Traiding Ltd (Стати) компаниялары жасаған алаяқтық туралы өзінің позициясы мен материалдарын егжей-тегжейлі таныстыруға мүмкіндік берді. Алаяқтық Статидің инвестицияларына әсер етеді", - деп хабарлады әділет министрлігі.