Австралияда мамонт жасушасынан жасанды ет жасалды
Жануарлардың жасушаларынан жасанды ет жасайтын австралиялық Vow Food компаниясы мамонт етінен жасалған фрикадельканы жұртшылыққа таныстырды, деп хабарлайды Stan.kz ақпарат агенттігі The Guardian порталына сілтеме жасап.
Етті қолдан жасау әдісінің мақсаты әлемде жануарларды өлтірмей, экологиялық мәселелерге назар аудару. Компания кең ауқымды мал шаруашылығы, жабайы табиғаттың жойылуы және климаттық дағдарыс арасындағы байланысты көрсетуге тырысады. Бұл австралиялық компания өзгелерден ерекшелену үшін сирек кездесетін немесе тіпті жойылып бара жатқан жануарлардың жасушаларын пайдалану арқылы өнім шығарады.
Компания 50-ден астам жануар түрінен, оның ішінде альпака, буйвол, қолтырауын, кенгуру, павлин және әртүрлі балық түрлерінен ет өсіру мүмкіндігін зерттеп үлгерген. Vow Food жасаған жапондық бөдене еті 2023 жылы алғаш рет Сингапур мейрамханаларында ұсынылады деп күтілуде.
Бас директор Джордж Пеппоу миллиардтаған ет жегіш адамдарды дәстүрлі жануарлардың ақуызын тұтынудан жасанды жолмен өндірілетін тағамға көшіруді мақсат еткенін айтады.
“Біз өсіруге оңай, шынымен дәмді және қоректік жасушаларды іздейміз. Осылайша, шынымен дәмді ет аламыз ", - деді ол.
Мамонт бұлшықетінің ақуызын қайта жасау үшін Vow Food Квинсленд университетіндегі Австралия биоинженерия институтының профессоры Эрнст Вулвтенгпен бірлесіп жұмыс істеді. Оның командасы ет дәмін беретін негізгі бұлшықет протеині - мамонт миоглобинінің ДНҚ тізбегін алып, піл ДНҚ-сы арқылы бірнеше бос орындарды толтыру арқылы өнімді шығарған.