Черногорияда отбасылық жанжалдан кейін ер азамат 10 адамды атып өлтірді
Черногорияның Четинье қаласында ер азамат отбасында болған жанжалдан кейін он адамды атып өлтірген, деп хабарлайды Stan.kz ақпарат агенттігі.
Тағы алты адам оқ жарақаттарымен ауруханаға жеткізілген. Көз жұмғандардың арасында екі бала бар.
"34 жастағы Четинье тұрғыны үй жалдап тұратын отбасыға оқ атқан. Аңшы мылтығымен ол сегіз және он бір жастағы екі баланы, олардың анасын атып тастаған. Әйел алған жарақаттарының салдарынан ауруханада көз жұмды”, – деді республикалық полиция департаментінің бастығы Зоран Брянин
Ер азамат одан кейін көшеге шығып, сол мылтықтан қала тұрғындарына оқ атқан, тағы жеті адамды өлтіріп, алты адамды жаралаған.
Келген полиция мен ер адамның арасында атыс болып, бір тәртіп сақшысы ауыр жарақат алған. Полиция атыс шығарған 34 жастағы ер адамды атып өлтірген.
Жергілікті ақпарат құралдарының хабарлауынша, оқиғаға отбасылық жанжал себеп болған.
Черногория билігі оқиғаға байланысты үш күндік аза тұту жариялаған.