Соңғы жаңалықтар
Соңғы жаңалықтар

Павлодарда жұмыстан қуылған полицей президенттен көмек сұрады

Павлодарда жұмыстан қуылған полицей президенттен араша сұрады. Әлеуметтік желіде бейнеұндау жолдаған ол Павлодар облысы бойынша Қылмыстық атқару жүйесі департамент басшысының орынбасарынан қысым көргенін жеткізеді, деп хабарлайды Stan.kz ақпарат агенттігі "Астана" арнасына сілтеме жасап.  

Айтуынша, оған жұмыстан босату туралы өтінішті мәжбүрлі түрде жазғызған.  12 қаңтарда департамент бастығының орынбасарына  бөлім бастығымен бірге белгісіз қара пакет апарып бердім дейді. Содан 2 күн өткен соң, департамент бастығының орынбасары оларды жұмыстан өз еркілеріңмен кетіңдер - деп қорқытқан көрінеді. Ақыры департаменттің екі бірдей қызметкері белгісіз себеппен жұмыстан шығарылғанын айтады. 

"Құрметті Қасым-Жомарт Кемелұлы! Мен Павлодар облысы бойынша Қылмыстық атқару жүйесі департаментінің қауіпсіздігі барынша жоғары АП-162/4 мекемесінің жедел бөлімінің жедел уәкілі болып жұмыс істедім. Мені бастықтарым жұмыстан заңсыз қуып жіберді. Осы жағдайға байланысты әділдік  орнағанын қалаймын. Зейнетке шығуыма 2 жыл қалды. 4 балам бар. Бұған дейін атқарған қызметіме байланысты ешқандай шағым болған жоқ", - дейді Павлодар облысы бойынша қылмыстық атқару жүйесі департаментінің бұрынғы қызметкері Тасболат Жақаев.

Аталған жағдайға байланысты Павлодар облысы бойынша Қылмыстық атқару жүйесі департаменті  қызметкердің өз еркімен жұмыстан кеткенін жеткізді.

"Аталған дерек бойынша өзіндік қауіпсіздік тобы қызметтік тексеру бастады. Сондай-ақ, АП 162/4 мекемесінде ішкі тексеру жұмыстары жүргізіліп жатыр. Яғни, тыйым салынған заттарды түрмеге кіргізу бойынша да тергеу жүргізіліп жатыр", - дейді Павлодар облысы бойынша қылмыстық атқару жүйесі департаментінің баспасөз хатшысы Гүлжан Абдуғалиева.

Талқылау